O, bu turniri 7-ci dəfə udmaqla rekorda imza atıb 

İtaliyanın Turin şəhərində tennis üzrə keşirilən və mükafat fondu 15 milyon dollar təşkil edən ilin yekun turniri (Nitto ATR Finals) başa catıb. Turnirin həlledici final matçında ATR-ın reytinq cədvəlinə vahid liderlik edən və dünyanın bir nömrəli raketka ustası hesab edilən serbiyalı Novak Cokoviçlə reytinq cədvəlində 4-cü yeri tutan italiyalı tennisçi Yannik Sinner qarşılaşıb.  Xard örtüklü açıq kortda keçirilən və 1 saat 40 dəqiqə davam edən bu qarşılaşma Cokoviçin qələbəsi ilə bitib - 6:3, 6:3. Bütün hallarda təcrübə yenə də öz sözünü deyib. 36 yaşlı serb tennisçi ilin yekun turnirini yeddinci dəfə udmaqla yeni rekorda imza atıb. 

Bu qələbədən sonra Cokoviç qarşısına daha böyük məqsəd qoyub. Onun məqsədi 2024-cü ildə həm "Böyük Dəbilqə"ni, həm Parisdə keçiriləcək Olimpiada-2024-ün qızıl medalını qazanmaqdır. 

Xatırladaq ki, ili dünya çempionu və dünyanın bir nömrəli raketka ustası kimi başa vuran Cokoviç aktivindəki 9945 xalla ATR-nin yekun reytinq cədvəlinə liderlik edir. Cədvəldə ikinci yeri 8455 xalla ispaniyalı Karlos Alkaraq tutur. İlk üçlüyü rusiyalı Danil Mevdevin (7200) tamamladığı cədvəldə 4-cü yeri isə ilin yekun turnirinin finalçısı olan italiyalı Yannik Sinner (5490) tutur. 

İNTİQAM Məmmədov