Xatirə Rəhimli: 

Cənab məmurlar, cavab verin, budurmu gördüyünüz işlər?

Problemləri tükənməyən paytaxt Bakı...

Bu şəhərin nəvaxtsa problemi bitəcəkmi?

Yağış suyuna qərq olmuş Bakı...

Bakının dərdi var, Bakı xəstədir,

Könül intizarda, göz yol üstədir.

(Səməd Vurğun)

Şair elə bil ki, bu günlər üçün yazıb bu misraları. Bakı həqiqətən də neçə illərdir ki, başdan-başa problem içindədir.

Amma yüksək vəzifəli məmurlar isə bu problemləri ya görməzdən gələrək həll etmirlər, ya da ki, həll etmək istəmirlər.

Bir neçə saatdı yağış yağır. Paytaxt Bakını yağış suyu ötən illərdə olduğu kimi yenə də cənginə alıb. Sanki sel Bakını aparır.

Bakı şəhərində yağış yağan kimi küçələrdə, yollarda demək olar ki, kiçik gölməçələr yaranır. Yolları, bəzi yeraltı tunelləri də bütünlüklə yağış suyu bürüyür.

İki gündür yağan yağış nəticəsində minik maşınları, hətta iritutumlu sərnişindaşıyan avtobuslar da suyun altında qaldı, hətta avtobusların salonu da yağış suyu ilə doldu.

Bu xoşagəlməz, utancverici haldan isə paytaxt sakinləri çox böyük əziyyət çəkdi.

Belə bir sual yaranır. Məmurlar nə işlə məşğuldur bəs? Onların işinin adı nədir?

Axı nə üçün işinizdə qətiyyən məsuliyyət hiss etmirsiniz? Yüksək vəzifə sahibi olsanız da, amma işinizə çox-çox səhlənkar yanaşırsınız cənab məmurlar.

Bakının bu yazıda yazmadığım o qədər saysız-hesabsız problemləri var ki hələ...

Bakı Şəhər İcra Hakimiyyətinin başçısı cənab Eldar Əzizov. Xatırladım ki, həm sizin, həm də rayon ica başçılarının maaşı yüksək şəkildə qaldırılıb. Amma yenə də yaxşı işləmirsiniz. Niyə, nədən və nə səbəbə?

Cənablar, gördüyünüz işlər budurmu?

Hər dəfə yağış yağanda Bakını bilirsinizmi nəyə görə su basır? Bilmirsinizsə, mən deyim, sizlər də xəbərdar olun, cənablar?

Ona görə ki, Bakının bir çox yerlərində drenaj sistemi və mərkəzləşdirilmiş kanalizasiya sistemi hələ də mövcud deyil.

Yağış suyunun axması üçün Bakıda drenaj sistemi nə üçün yoxdur? Cənab məmurlar, cavab verin, budurmu gördüyünüz işlər?

Deyin, bu problemləri nəyə görə həll etmək istəmirsiniz? Görəsən buna səbəb nədir?

Bakı şəhərinin su təchizatı və kanalizasiya sisteminin yenidən qurulması ilə bağlı, eləcə də şəhərin ekoloji və sanitar vəziyyətinin yaxşılaşdırılması məqsədilə son 20 il ərzində dövlət büdcəsindən milyonlarla, hətta milyardlarla maliyyə vəsaiti ayrılıb.

Bu vəsait hara və nəyə xərclənib? Bəlkə kimlərinsə cibinə dolub bu milyonların çox hissəsi. Aidiyyəti qurumların rəhbərləri, bu suala cavab verə bilərsinizmi?

Baş vermiş xoşagəlməz olaylardan belə məlum olur ki, ölkədəki bu sel fəlakətini korrupsiya yaradıb. Bu, təbii ki, belədir.

Yağış sularından yaranan sel və gölməçələr bir çox problemlərə səbəb oldu. Bir neçə saat ərzində fasiləsiz yağan yağış, yolları, fərdi yaşayış evlərini, həyətləri ağuşuna aldı.

Öz işinə səhlənkar yanaşan məmurlar. Bir məsələni də diqqətinizə çatdırım, bilin.

Dünyada elə böyük şəhərlər var ki, həmin şəhərlərə tez-tez intensiv yağış yağır. Onu da qeyd edim ki, o şəhərlərin hər birinin hətta bir neçə milyon əhalisi var.

Amma neçə gün ərzində o şəhərlərdə güclü yağış yağsa da, Bakıda yağış sularından yaranmış dəhşətli mənzərələr o şəhərlərdə qətiyyən yaranmır və heç bir fəlakət olmur.

Deməli, açıq-aydın şəkildə belə məlum olur ki, Avropa ölkələrində çalışan hər bir məmur Bakıdakı yüksək vəzifəli məmurlardan fərqli olaraq cavabdeh olduqları işlərə çox-çox böyük məsuliyyətlə yanaşırlar.

Həm də Avropa ölkələrində hər bir sahədə çox düzgün və mükəmməl sistem yaradılır.

Hörmətli Eldar Əzizov, bəs sizlər niyə belə işləyə bilmirsiniz? Səbəblər nədir görən?

Onu da xatıradım ki, 2024-cü ilin oktyabrında yağış sularının Sabunçu keçidinə dolması nəticəsində iki nəfər boğularaq həyatını itirmişdir.

Çox təəssüf ki, ötən il də, elə bugünlərdə Bakıya yağan yağışın törətdiyi fəsadlar ucbatından Sabunçu keçidini yenə də su basıb, yollar keçilməz olub.

Həmçinin Bakının bir neçə kəndinin, bəzi qəsəbələrin yolları da yağış suyunun altında qalaraq böyük problemlər yaradıb.

Cənab məmurlar, işinizdə bir qədər də olsa məsuliyyətli olun. Azərbaycan həm də sizin vətəninizdir axı. Vətəni sevmək lazımdır.

Belə bir fikir var: Vətəni sevmək imandandı!

P. S. Görəsən, Eldar Əzizov yenə də günahı məmurlarda yox, təbiətdə görəcək?

XATİRƏ ƏZİZ Rəhimli

Şair-jurnalist