Əli Laricani Trampı ölümlə hədələyib

İranın Ali Milli Təhlükəsizlik Şurasının rəhbəri Əli Laricani ABŞ prezidenti Donald Trampa "yox olmamaq üçün" diqqətli olmalı olduğunu xəbərdar edib.

Ayətullah rejiminin ən nüfuzlu şəxslərindən biri olan Laricani bunu özünün X hesabında Trampın İranın Hörmüz boğazını bağlayacağı təqdirdə "sarsıdıcı zərbə" ilə bağlı sözlərinə reaksiya verərək yazıb.

"Aşura ruhunda yaşayan (yəni iman naminə şəhidliyə hazır olan) İran xalqı sizin boş təhdidlərinizdən qorxmur. Hətta sizdən güclü olanlar belə onları məhv edə bilmədilər. Buna görə də diqqətli olun, yox olmayın", - deyə Laricani bildirib. Daha sonra başqa bir paylaşımda o, Tehranın hərbi imkanlarını məhv etmək üçün genişmiqyaslı kampaniya aparan ABŞ və İsrailə istinad edərək Hörmüz boğazının "ya hamı üçün sülh və rifah boğazına, ya da müharibəni qızışdıranlar üçün məğlubiyyət və əzab boğazına çevriləcəyini" bildirib.

Bu, Laricaninin son günlərdə Trampın İran ordusunun hədəfinə çevrilə biləcəyinə işarə etdiyi ikinci haldır. Şənbə günü o, ABŞ prezidentinin İrana qarşı Amerika-İsrail hücumlarına görə "bədəlini ödəməli" olduğunu söylədi. "Onun nədən və ya kimdən danışdığından xəbərim yoxdur. Mənim üçün fərqi yoxdur", - deyə Tramp cavab verib.

10 martda Ağ Ev rəhbəri "Truth Social"da yazırdı ki, Vaşinqton Fars körfəzindəki vacib bir boğaz nöqtəsi olan Hörmüz boğazını bağlasa, İrana sarsıdıcı zərbə endirəcək. ABŞ prezidenti bildirib ki, "Əgər İran Hörmüz boğazından neft axınını dayandıran hər hansı bir tədbir görərsə, Amerika Birləşmiş Ştatları onlara bizdən 20 dəfə daha ağır zərbə endirəcək".

"Bundan əlavə, biz İranın bir millət kimi yenidən qurulmasını faktiki olaraq qeyri-mümkün edəcək həssas hədəfləri məhv edəcəyik - onların üzərinə ölüm, od və qəzəb yağacaq - amma ümid edirəm və dua edirəm ki, bu baş verməsin!" - deyə Tramp yazıb.