“Əgər bir gün dünya qaranlığa qərq olarsa, mərhəmət onu işıqlandıran son şam olacaq”

3 Mart tarixində Azərbaycan Dövlət Filarmoniyasında “Ümid yeri” Xeyriyyə Cəmiyyəti İctimai Birliyinin təşkilatçılığı, Baku Media Mərkəzinin dəstəyi ilə Respublikada ilk dəfə “Mərhəmət Gecəsi” keçirilib. 
Tədbirdə gənc və istedadlı memar-rəssam, Azərbaycan Memarlar və Rəssamlar İttifaqının, UNESCO Beynəlxalq Rəssamlar Birliyinin üzvü, Prezident təqaüdçüsü İsmayıl Hacıyevin və gecədə əməyi olan digər rəssamların əsərləri sərgilənib. Nümayiş etdirilən rəsmlərin əsas motivini mərhəmət və mərhəməti ilə örnək olan şəxsiyyətlər təşkil edib. 
Qonaqlar, Qərbi Azərbaycan İcmasının sədri, millət vəkili Əziz Ələkbərli, millət vəkili Vüqar İskəndərov rəsmlərlə tanış olduqdan sonra gecənin bədii hissəsi başlayıb. Konsert proqramında ilk dəfə “Ümid Yeri” Uşaq Sığınacağının valideyn himayəsindən məhrum uşaqları, əlilliyi olan, görmə məhdudiyyətli, autizmli yeniyetmələrin iştirakı ilə yoqa, rəqs və musiqi nömrələri ifa olunub, səhnəciklər nümayiş etdirilib. Orkestrin müşayəti ilə tanınmış müğənnilərin ifasında H.Əliyev Fondunun vitse-prezidenti, qayğıkeşliyi ilə hər zaman örnək olan Leyla xanım Əliyevaya həsr olunan yeni bəstələr ictimayyətə təqdim edilib. Leyla Əliyevanın müəllifi olduğu şeirlər səsləndirilib.      
“Mərhəmət Gecəsində” “Ümid Yeri” Uşaq Sığınacağının rəhbəri Nigar Mənsimli çıxış edib. O, tədbir iştirakçılarına təşəkkürünü bildirib. “Azərbaycanın hər zaman tarix boyu mərhəmətli insanları, xeyriyyəçilik missiyası həyata keçirən şəxsiyyətləri olub. Onlar öz xoş əməlləri ilə tarix yazıblar – yaşayıblar, qurublar, yaradıblar. Belə insanlar heç zaman unudulmurlar, hər zaman sevgi və ehtiramla anılırlar. Və nə yaxşı ki, bu gün də dünya belə mərhəmətli insanlardan xali deyil. Onlar qocaları, ahılları, tənha insanları, xüsusi qayğıya ehtiyacı olan kimsəsiz uşaqları heç zaman tək qoymur, təmənnasız sevgi və qayğıları ilə əhatə edirlər. Bu gün bu tədbirin təşəbbüskarı və təşkilatçısı olan “Ümid yeri” Uşaq sığınacağının sakinləri də belə mərhəmətli insanların qayğısı ilə əhatələniblər. Mən hər birinizə, xüsusilə bu gecədə bizimlə olduğunuz üçün minnətdaram”. 
Sonra Nigar Mənsimli layihənin icraçıları – Əməkdar jurnalist, tədbir təşkilatçısı Elnarə Dərziyeva ilə şair, qiraət ustası, aparıcı Səbuhi Zamanı səhnəyə dəvət edərək, minnətdarlığını bildirib, onlara təşəkkürnamələr təqdim edib. 
Layihədə öz benefisiarları və tələbələri ilə iştirak edən DOST İnkluziv İnkişaf və Yaradıcılıq Mərkəzi, Sənət Uşaq Musiqi və İncəsənət Mərkəzi, Bakı Media Mərkəzi, Azərbaycan Dövlət Musiqili Akademik Teatrı, Müslüm Maqomayev adına Dövlət Akademik Filarmoniyası, “Theraplay” psixologiya və nitq inkişafı mərkəzi, quruluşçu rejissor Samir Qulamov, bəstəkar Sevinc Tofiqqızı, yoqa təlimçisi İlhamə Şirinova, rəssam Ramal Kazımov və müğənni Dilarə Kazımova təşəkkürnamələrə layiq görülüblər.          
Türk Ağsaqqaları İctimai Birliyinin Gənclər Şurasının sədr müavini Müşfiq Nəsirliyə tədbirin konüllülərlə təşkilində dəstəyə görə minnətdarlıq ifadə olunub.
Bununla yanaşı layihədə xüsusi əməyi olan telejurnalist, ssenarist Minarə Xəlilova və Mədəniyyət televiziyasının redaktoru, prodüser Vüsalə İsmayılovaya təşəkkür bildirilib.           
Gecədə korporativ sosial məsuliyyətini dərk edən, davamlı xeyriyyə missiyaları gerçəkləşdirən “Snerjipro” şirkətinin rəhbəri Ufuk Aydın və “Azərlotereya” Açıq Səhmdar Cəmiyyətinin idarə heyətinin sədri Osman Karakuş ”Mərhəmət elçisi” mükafatına layiq görülüblər. Bununla yanaşı, gecənin ərsəyə gəlməsində dəstək olan “Ziraat Bank Azərbaycan ”, “GL Group”, “Zenith Group” və xeyriyyəçi xanım Anna Çerkasovaya mərhəməti əks etdirən rəsmlər təqdim olunub.  
Tədbirdə nazirliklərin və dövlət qurumlarının nümayəndələri, millət vəkilləri, QHT sədrləri, özəl şirkət rəhbərləri, incəsənət xadimləri və media nümayəndələri iştirak ediblər.