“Məkr və məhəbbət” əsəri Masallı səhnəsində

Nəcəf bəy Vəzirov adına Lənkəran Dövlət Dram Teatrının kollektivi klassik alman ədəbiyyatının zirvəsi sayılan Fridrix Şillerin "Məkr və məhəbbət" əsəri əsasında hazırlanmış eyniadlı tamaşa ilə Masallı rayonunda qastrol səfərində olub.
Xalq artisti Qabil Quliyev, əməkdar artist Sucəddin Mirzəyev, aktyorlar Miraslan Ağayev, Səyad Əliyev, Elçin Hacıyev, Saleh Əzimzadə, Məleykə Cəfərova, Gülər Kərimli, Ayşən Əsədova, Emil Rzayev və Teymur Hacızadənin iştirak etdiyi tamaşa Masallı şəhər Heydər Əliyev Mərkəzində nümayiş etdirilib.
Səhnə əsəri tamaşaçılar tərəfindən böyük maraq və alqışlarla qarşılanıb.
Təqdimatdan sonra Masallı Rayon İcra Hakimiyyətinin başçısı Araz Əhmədov Lənkəran Dövlət Dram Teatrının direktoru, Azərbaycan Respublikasının Əməkdar mədəniyyət işçisi və Dağıstan Respublikasının Əməkdar artisti Laləzar Hüseynova və kollektivinə möhtəşəm əsərə görə təşəkkürünü bildirib.
Lənkəran Dövlət Dram Teatrının direktoru Laləzar Hüseynova da öz növbəsində onlara yaradılan şəraitə görə rayon rəhbərinə minnətdarlığını ifadə edib.
Məlumat üçün bildirək ki, tamaşanın quruluşçu rejissoru, Azərbaycan və Kalmıkiya Respublikalarının Əməkdar İncəsənət Xadimi Bəhram Osmanov, quruluşçu rəssamı Fuad Babazadə, musiqi tərtibatçısı Vüqar Fərəcov, rejissor köməkçisi Nuranə Nəcəfovadır.
Alman romantizmi və "burjua faciəsi" janrının mühüm nümunələrindən olan "Məkr və məhəbbət" əsərinin mərkəzi mövzusu sosial riyakarlıqla şəxsiyyət azadlığı, təbəqələşmə ilə insan duyğuları arasındakı toqquşmadır. Sevgi və cəmiyyətin sərt qanunları arasında qalmış iki gəncin faciəvi məhəbbət hekayəsini nəql edən əsər eyni zamanda hakimiyyət  və fərdi azadlığın boğulması kimi mövzuları kəskin şəkildə tənqid edir. 

Akif AĞAYEV