Masallıda yüksək bal toplamış abituriyentlərlə görüş 

Masallıda ali məktəblərə qəbul imtahanında yüksək nəticə əldə etmiş abituriyentlərlə görüş keçirilib.
Tədbir öncəsi Ümummilli lider Heydər Əliyevin və Azərbaycan ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib, Dövlət Himnimiz səsləndirilib.
«Azpresstimes.info» xəbər verir ki, ali məktəblərə qəbul imtahanlarında yüksək nəticə göstərən abituriyentləri, müəllim və valideynlərini təbrik edən Masallı Rayon İcra Hakimiyyətinin başçısı Araz Əhmədov çıxışında bildirib: “Ulu Öndər Heydər Əliyevin “Təhsil millətin gələcəyidir” sitatına əsaslanaraq arzu edirəm ki, qəbul olunduğunuz Ali məktəblərdə təhsilinizi yüksək səviyyədə davam etdirib, ixtisaslaşmış kadr kimi rayonumuzda fəaliyyət göstərəsiniz. Bu gün ölkəmizdə cənab Prezident tərəfindən aparılan gənclər siyasəti və gənclərə göstərilən diqqət sizlərin gələcəyə nikbin baxmağınıza, arzularınızı həyata keçirməyinizə əsas verir…”
Masallı rayonu üzrə Təhsil Sektorunun müdiri Elman Rzayev ötən tədris ilində ümumi təhsil məktəblərinin XI siniflərini bitirmiş 1800 məzundan 985 nəfəri ali məktəblərə qəbul olmaq üçün qeydiyyatdan keçdiyini, onlardan 700 nəfəri ali məktəblərə qəbul olduğunu, ali məktəblərə qəbul olan məzunlardan 35 nəfərinin 600 baldan, 61 nəfərinin isə 500 baldan yuxarı nəticə göstərdiyini, həmçinin 500 baldan yuxarı nəticə göstərən məzunlardan 36 nəfərini, 600 baldan yuxarı nəticə göstərən məzunlardan isə 17 nəfərini qızlar təşkil etdiyini diqqətə çatdırıb.
Lənkəran-Astara Regional Təhsil İdarəsinin müdiri Bəhruz Mehdiyev Masallı təhsilində qazanılan uğurlardan danışaraq ali məktəblərə qəbul olmuş abituriyentlərə uğurlar arzulayıb.
Sonda 600 baldan yuxarı nəticə göstərmiş abituriyentlərə fəxri fərman və qiymətli hədiyyələr təqdim edilib.