Ağcabədi rayonunda keçirilən “Debat – Təsdiq və inkarın ünsiyyətdə rolu” layihəsi uğurla yekunlaşıb

Layihənin sonunda məktəbdaxili və məktəblərarası debat yarışları təşkil olunub. Sonda baş tutan “Pul xoşbəxtliyi təmin edə bilərmi?” mövzusundakı debat yarışında iştirakçılar öz arqumentlərini əsaslandıraraq çıxış ediblər. Yarışın qalib komandasına hədiyyələr və sertifikatlar təqdim olunub. Tədbir iştirakçıların əldə etdikləri bilik və bacarıqları nümayiş etdirməsi baxımından önəmli mərhələ olmuşdur.
Qeyd edək ki, Laçın rayon Şeylanlı kənd 2 nömrəli tam orta məktəbində icra olunan layihə çərçivəsində təlimçi Pərvin Əhmədova tərəfindən debat təlimləri keçirilib. Təlimlər 6, 7 və 8-ci sinif şagirdlərini əhatə etmiş, şagirdlərin tənqidi düşünmə, çıxış etmə, komanda işi və ünsiyyət bacarıqlarının inkişafına yönəlmişdir. Layihə boyunca şagirdlər debat qaydaları, texnikaları və əsas formatlarla tanış olmuş, mütəmadi məşğələlər vasitəsilə bu biliklərini təcrübədə tətbiq etmişlər.
Ümumilikdə 3 qrupda (hərəsində 10 nəfər) 4 debat təlimi təşkil olunmuş, ardınca məktəbdaxili debat yarışları keçirilmişdir. Nəticə etibarilə şagirdlər intellektual fəallıq nümayiş etdirmiş, öz mövqelərini əsaslandırmaq, qarşı tərəfi dinləmək və arqumentasiya bacarıqlarını inkişaf etdirmək imkanı əldə etmişlər.
Layihənin sonunda iştirakçı məktəblərdə debat vərdişlərinə yiyələnmiş təcrübəli komandalar formalaşmış, bu da həm təhsil müəssisələrində intellektual fəaliyyətin artmasına, həm də məktəblərarası əlaqələrin möhkəmlənməsinə şərait yaratmışdır. Fiziki qarşılıqlı ünsiyyətə əsaslanan bu təcrübə gənc nəslin şəxsi və akademik inkişafına töhfə verməklə yanaşı, Azərbaycan təhsilində ünsiyyət və əməkdaşlıq mədəniyyətinin inkişafına da xidmət etmişdir.
Xatırladaq ki, layihə Təhsildə inkişaf və innovasiyalar üzrə VIII qrant müsabiqəsinin çərçivəsində adıçəkilmiş məktəbin coğrafiya müəllimi Xalid Xalidli tərəfindən icra olunmuşdur.