Bu gün 63 yaşı tamam olacaqdı...

Bu gün Azərbaycanın Milli Qəhrəmanı İqor Kşnyakinin doğum günüdür.

Ötən il dekabrın 24-də “Azərbaycan Hava Yolları” QSC-nin (AZAL) “Embraer-190” təyyarəsinin kapitanı öz həyatı bahasına Bakı-Qroznı reysi ilə uçan onlarla sərnişini xilas edib.

Təyyarədə 62 sərnişin və 5 ekipaj üzvü olub. Pilotların - İ.Kşnyakin və Aleksandr Kalyaninovun məharəti və fədakarlığı sayəsində 29 nəfər sağ qalıb. İdarəetmə sistemlərinin sıradan çıxmasına baxmayaraq, onlar ən yüksək qiyməti ödəyərək Xəzər dənizindən düşən təyyarəni Aktau hava limanı yaxınlığındakı əraziyə yönəldə biliblər. İ.Kşnyakin, ikinci pilot və stüardessa Hökümə Əliyeva 35 sərnişinlə birlikdə yerə çırpılaraq ölüb.

Sonradan məlum olub ki, təyyarə Rusiya hava hücumundan müdafiə qüvvələrinə məxsus “Pantsir-S1” zenit-raket kompleksi tərəfindən vurulub...

Yaşasaydı bu gün 63 yaşı tamam olacaqdı...

İqor İvanoviç Kşnyakin 1962-ci il mayın 19-da Bakıda anadan olub. İlk uçuş təlimini 1982-ci ildə Sasovo Mülki Aviasiya Uçuş Məktəbində pilot ixtisası üzrə bitirmişdir. Daha sonra Rusiya Dövlət Hidrometeorologiya İnstitutunu meteorologiya ixtisası üzrə bitirib.

O, əmək fəaliyyətinə An-2-nin ikinci pilotu kimi başlayıb, 1997-ci ildə Azərbaycan Mülki Aviasiya İdarəsinin Yak-40-ın komandiri olub. 2013-cü il dekabrın 11-dən AZAL-ın Uçuşların istehsalı idarəsinin Uçuş Xidmətinin Embraer-170/190 təyyarəsinin komandiri vəzifəsinə təyin edilib. İ.Kşnyakinin 15 min saatdan çox uçuş vaxtı var ki, bunun da 11 mini təyyarə komandiri olub.

İ.Kşnyakin 2024-cü il dekabrın 29-da Bakıda II Fəxri Xiyabanda fəxri adlarla dəfn edilib. Prezident İlham Əliyevin sərəncamı ilə ona ölümündən sonra “Azərbaycanın Milli Qəhrəmanı” adına layiq görülüb.

Həlak olan pilotun həyat yoldaşı, oğlu və üç qızı qalıb.