Ankarada Ukrayna səfirliyinin yeni binasının açılışı olub

Kiyev Ukraynaya təhlükəsizlik zəmanəti vermək əsasında sülhün bərqərar olmasının tərəfdarıdır. Bunu Ukrayna prezidenti Vladimir Zelenski Ankarada ölkənin səfirliyinin yeni binasının açılış mərasimində çıxışı zamanı deyib.

Ukrayna prezidenti Türkiyəyə rəsmi səfərə gəlib.

Onun sözlərinə görə, Kiyev ABŞ, Avropa İttifaqı və Türkiyəni qarant kimi görmək istəyir.

“Bir ölkə olaraq biz sülh istəyirik, müharibənin bitməsini istəyirik. Amma təbii ki, biz istəyirik ki, bu müharibənin sonu müəyyən təhlükəsizlik təminatlarının verilməsinə əsaslansın. Biz bu təhlükəsizlik zəmanətlərinin ABŞ, Avropa Birliyi və Türkiyə də daxil olmaqla bütün Avropa tərəfindən təmin edilməsini istəyirik”, - deyə Ukrayna lideri xüsusilə qeyd edib.

Eyni zamanda, prezident Ukraynanın ərazi bütövlüyünün təmin edilməsinin vacibliyini vurğulayıb.

Zelenski bu məsələlərin Türkiyə prezidenti Rəcəb Tayyib Ərdoğanla danışıqları zamanı müzakirə olunacağını bildirib.

Dövlət başçısı qeyd edib ki, bundan əvvəl türkiyəli həmkarı Rəcəb Tayyib Ərdoğanla “nəticəyönümlü” danışıqlar aparıb. O, Ankaranın Rusiya-Ukrayna münaqişəsinin sülh yolu ilə həllinə yönəlmiş vasitəçilik səylərini xatırladıb.

Türkiyənin məhbus mübadiləsində köməyini vurğulayan Zelenski qeyd edib ki, “ukraynalıların evlərinə qayıtması” və “ərzaq təhlükəsizliyi” məsələləri Ukrayna üçün böyük əhəmiyyət kəsb edir.

Zelenski Ukraynanın Ankaradakı səfirliyinin yeni binasının açılışını “çox simvolik” adlandırıb. Prezident qeyd edib ki, mərasimdə Krım tatar diasporunun nümayəndələri iştirak ediblər.

Zelenski qeyd edib ki, onun tikintisində çoxlu adamlar, o cümlədən Ukraynanın xarici işlər naziri və Ankaradakı keçmiş səfir Andriy Sıbiqa da iştirak edib.