Sabah PÇL-na start veriləcək 

Sabah Binə Atçılıq Mərkəzində atüstü oyunlar arasında ən populyari olan çövkən oyunu üzrə ölkəmizdə ilk dəfə keçiriləcək Peşəkar Çövkən Liqasına start veriləcək. Bu məqsədlə də bu gün adıçəkilən məkanda Azərbaycan Respublikasının Atçılıq Federasiyasının (ARAF) baş katibi Bəhruz Nəbiyev mətbuat konfransı keçirdi. 

"Çövkən oyunu atüstü oyunlar arasında ən populyaridir. İndiyədək ölkəmizdə bu idman növü üzrə müxtəlif səviyyəli yarışlar kecirilib. Ötən il isə 6 komandanın iştirakı ilə ilk dəfə olaraq beynəlxalq turnir keçirildi" deyən baş katib qeyd etdi ki,  bu il isə ölkəmizdə bu idman növü üzrə ilk dəfə olaraq, Peşəkar Çövkən Liqası keçiriləcək. Onun sözlərinə görə, liqada, paytaxtdan və regionlardan olan 10 komanda  ("Aqstafa",  "Elit", "Embavud", "Köhlən", "Qarabağ", "Çövkən", "Zəfər", "Omar", "Polad", və "Sərhədçi") 18 turdan ibarət olan iki dövrədə mübarizə aparaq. Turlar ev və səfər oyunu çərçivəsində  keciriləcək. Qələbəyə görə komandaya 3, heç-heçəyə görə isə 1 xal veriləcək. 

Baş katib bildirdi ki, 3-4 dekabr günlərində son turla yekun vurulacaq liqanın oyunları "CBC Sport'la yayımlanacaq. 

"Liqanın sonunda müxtəlif nominasiyar üzrə ən yaxşılar təltif olunacaqlar. Liqada mövsüm bitəndən sonra ölkəmizdə ənənəvi Prezident Kuboku uqrunda turnir keçiriləcək. Sonda ilə liqanın qalibi ilə Prezident Kubokunun sahibi arasında mövsümün Super Kuboku uqrunda oyun keçiriləcək" deyən Nəbiyev onu da bildirdi ki, liqada yalnız DNT testdən kecən milli cins atlardan ("Qarabağ" və "Dilbazi") istifadə ediləcək. Onun sözlərinə görə PÇL-nin yüksək mukafat fondu olacaq. 

Bəhruz Nəbiyev onu da bildirdi ki, 2026-ci ildə liqanın ikinci dəstəsi də yaradılacaq və orada ən çox xal toplayan 2 və ya 3 komanda yüksək liqada oynamaq imkanı qazanacaq. Bununla da PÇL-da komandaların sayı artacaq.

"Bizim ən əsas məqsədlərimizdən biri Olimpiada-2028-də heç olmasa atçılıq idmanının iki növündə təmsil olunmaqdir. Artıq bu istiqamətdə hazırlıq işləri gedir" - Bəhruz Nəbiyev belə dedi.

İNTİQAM Məmmədov