Dortmund "Borussiya"si ÇL-nin yarımfinalında "PSJ"-ni "əzərək" finala yüksəlib 

Dünən axşam saatlarında futbol üzrə UEFA Çempionlar liqasında yarımfinal mərhələnin cavab oyunlarına start verilib. İlk olaraq münasibətləri ayırd etmək üçün "PSJ" (Fransa) ilə Dortmund (Almaniya) "Borussiya"si qarşılaşıb. Fransanın paytaxtı Parisdə keçirilən oyunun qalibi almanlar olublar - 0:1. Matçın taleyini həll edən yeganə qolun müəllifi 50-ci dəqiqədə Mats Xummels olub. Olduqca gərgin mübarizə şəraitində keçən bu oyunda ən azından 4 dəfə qapı tirinini nişan alan Fransa təmsilçisi rəqib qapısına heç cürə yol tapa bilməyib. 90 dəqiqəlik qarşılaşma bu hesabla bitincə "Borussiya" 2023/24-cu illər mövsümündə Çempionlar liqasının ilk finalçısı olub. 

Xatırladaq ki, "Borussiya" bir həftə öncə Almaniyada keçirilən birinci oyunda da eyni hesabla qalib gəlmişdi. Beləliklə, ümumi hesab Almaniya təmsilçisinin xeyrinə olub 2:0.

Turnirdə yarımfinal mərhələnin daha bir cavab oyunu bu gün İspaniyanın paytaxtı Madriddə keçiriləcək. Burada isə Avropanın iki qrand klubu qarşılaşacaq. Madriddəki "Santyaqo Bernabeu" stadionunda "Real" klubu Munhenin (Almaniya) "Bavariya" klubunu qəbul edəcək. Xatırladaq ki, bir həftə öncə Almaniyada baş tutan birinci oyunda tərəflər hərəyə 2 qol vurmaqla meydanı sülh şəraitində tərk ediblər - 2:2.

Bir məqamı da qeyd edək ki, turnirin həlledici final matçı iyunun 1-də İngiltərənin məşhur "Uembli" stadionunda keçiriləcək.

İNTİQAM Məmmədov