"Azərreyl" Azərbaycan çempionudur!!!

"Murov Az Terminal" titulunu qoruya bilmədi 

Bu kişi voleybol klublarının mübarizə apardığı Azərbaycan çempionatınlın Yüksək Liqasında baş tutan həlledici final matçı ilə 2023\2024-cü illər mövsümünə yekun vurulub. Bakı İdman Sarayında keçirilən finalda "Azəreyl" klubu ilə son iki ilin çempionu adını daşıyan "Murov Az Terminal" qarşılaşıb. Olduqca gərgin mübarizə şəraitində keçən və taybrekə qədər uzunmaqla 5 setdən ibarət olan bu oyunda qələbəyə və eyni zamanda çempionluğa sevinən "Azərreyl" olub. Olduqca dramatik bir məcrada davam edən qarşılaşmada belə nəticə qeydə alınıb - 3:2 (29:27, 25:27, 19:25, 32:30, 15:13). Setlərdən də göründüyü kimi, oyunun gedişatında gah bu, gah digər komanda hesabda irəli çıxıb. Bununla da "Azərreyl" kişi voleybol klubu öz tarixində ilk dəfə olaraq Azərbaycan çempionu adını qazanıb. Əvəzində iki il dalbadal ölkə çempionu olan "Murov Az Terminal" isə titulunu qoruya bilməyib. 

Xatırladaq ki, bu final oyunundan iki gün öncə isə Bakı Voleybol Mərkəzində çempionatın bürünc medalçısı müəyyənləşib. Həmin oyunda isə "Neftçi" klubu MOİK üzərində çətinlik çəkmədən quru hesablı qələbə qazanıb - 3:0.

Sabah isə Bakı İdman Sarayında qadın klublarının çıxış etdiyi analoji çempionatın həlledici final matçı keçiriləcək. 

Saat 16:00-da başlanacaq həmin oyunda Azərbaycanın qadın voleybolunun flaqmanı sayılan "Azərreyl"lə "Abşeron" klubu qarşılaşacaq və bununla da qadınların çempionatında da mövsüm bitəcək (sentyabr ayına qədər fasilə olacaq). Yeri gəlmişkən, qadınların çempionatında üçüncü yeri iki gün öncə Bakı Voleybol Mərkəzində "Gəncə"ni məğlub (3:0) edən "Murov Az Terminal" tutub.

İNTİQAM Məmmədov