“Xocalıdan danış mənə!” adlı anım tədbiri keçirildi

Cəfər Cabbarlı adına Azərbaycan Dövlət Teatr Muzeyində  23 fevral 2024-cü il tarixində saat 14:00 -da Xocalı faciəsinin 32-ci ildönümünə həsr olunmuş “Xocalıdan danış mənə!” adlı anım tədbiri keçirildi. 

Tədbir Cəfər Cabbarlı adına Azərbaycan Dövlət Teatr Muzeyi və İrəli İctimai Birliyinin daxilində fəaliyyət göstərən Mədəniyyət Mərkəzinin birgə təşkilatçılığı ilə baş tutdu.

Tədbirin başlanğıcında vətən uğrunda həlak olmuş bütün şəhidlərimizin əziz xatirəsi bir dəqiqəlik sükutla yad edildi. Ardınca elmi-kütləvi işlər şöbəsinin müdiri Ümidə Hacıyeva Qarabağ hadisələri və Xocalı soyqırımı mövzusunda geniş məruzə ilə çıxış etdi. Daha sonra 2012-ci ildə “Azərbaycanfilm” kinostudiyasında istehsal edilmiş “Dolu” bədii filmi nümayiş olundu. Yazıçı, ssenarist, “Şöhrət” ordenli Aqil Abbasın eyniadlı romanı əsasında ekranlaşdırılmış bu tammetrajlı bədii filmin rejissoru Əməkdar incəsənət xadimi Elxan Cəfərovdur. Ermənistanın Azərbaycana qarşı hərbi təcavüzündən, vətən uğrunda son damla qanına qədər döyüşən Azərbaycanın mərd, igid oğullarının qəhrəmanlıqlarından bəhs edən bir filmi gənclər və yeniyetmələrdən ibarət auditoriya ilə birgə seyr etmək onlara qan yaddaşımızı unutdurmamaq məqsədi daşıyır. Bu tariximizin, milli irsimizin, vətənimizin, ərazi bütövlüyümüzün qorunması məsələlərində gələcək nəslin daima həssas, iradəli və hünərli olmağına yönəlmiş bir addımdır.

Film bitdikdən sonra auditoriya ilə maarifləndirici söhbətlər aparıldı. İştirakçılar bu barədə öz təəssüratlarını bölüşdülər. 
Sonda xatirə şəkilləri çəkildi. 

Tədbirdə gənclər, muzey əməkdaşları və media nümayəndələri iştirak etdilər.

Araz Məmmədov