"Döyüşdən şəhadətə gedən yol 128 gün" adlı kitabın təqdimatı keçirilib

Fevralın 10-u tarixində Azərbaycan Yazıçılar Birliyinin üzvü, Prezident mükafatçısı şairə Esmira Günəşin 44 günlük Vətən müharibəsinin şəhidi İsmayılzadə Tacəddin Vüqar oğlunun xatirəsinə həsr etdiyi "Döyüşdən şəhadətə gedən yol 128 gün" adlı kitabının təqdimatı keçirilib.

AZpressTİMES.info xəbər verir ki, tədbir şəhidin anım günü ərəfəsində Sumqayıt şəhər Heydər Əliyev Mərkəzində baş tutub.

Tədbirdə Şəhid ailələri, qazilər, İcra Hakimiyyətinin nümayəndələri, Abşeron-Xızı Regional Mədəniyyət İdarəsinin kollektivi, Abşeron-Xızı Regional Təhsil İdarəsinin kollektivi, Sumqayıt Musiqi Kollecinin müəllimləri, tələbələri, Sumqayıt şəhər Bələdiyyə İdarəsinin rəhbərliyi, 1 saylı Uşaq İncəsənət Məktəbinin direktoru, müəllimləri, şagirdləri, Sumqayıt şəhərində fəaliyyət göstərən digər məktəblərin direktorları, Sumqayıt şəhər Asan Xidmət mərkəzinin könüllüləri, "Qızıl Aypara" cəmiyyətinin üzvləri, "Gözdən əlillər" cəmiyyətinin üzvləri, şairlər, aktyorlar, müğənnilər, rəssamlar, müəllimlər, şagirdlər, valideynlər, şəhid Tacəddinin doğmaları və s. iştirak ediblər. Tədbirə dəvət olunan Deputatlar Milli Məclisin iclası ilə əlaqədər iştirak edə bilməsələr də, Sumqayıt şəhər üzrə depudat Elnarə Akimova tədbirlə bağlı video göndərərək hər zaman şəhid ailələrinin yanında olduğunu bildirib. Şəhid Tacəddin İsmayılzadənin təhsil aldığı İnternat tipli gimnaziyanın Direktoru Fəridə müəllimin rəhbərliyi ilə tədbirdə onun məktəbi daha fəal iştirak edib. Şəhidin adını daşıyan ibtidai sinif şagirdləri hazırladıqları kompozisiya ilə, məktəbin yuxarı sinif şagirdləri isə qızıl güllərlə şəhidin anasının ətrafına toplaşaraq gözəl anların yaşanmasına səbəb olublar.  Bunlardan əlavə məktəbin kollektivi tərəfindən həm şəhid anasına, həm də şairə Esmira Günəşə gül buketləri təqdim olunub. Fəridə müəllimin məktəb adından şəhid anasına hədiyyə etdiyi rəsm albomunda şəhid Tacəddinin məktəb illərində çəkilən xatirə şəkillərinin yer aldığını biləndə hər kəs duyğulanıb. Fəridə müəllim həmçinin belə gözəl bir kitab ərsəyə gətirdiyi üçün şairə Esmira Günəşə məktəb adından Fəxri Fərman təqdim edib.

Bir-birindən maraqlı çıxışlar və gələn qonaqların gözəl hədiyyələri ilə tədbir daha da rəngarəng olub. Sumqayıt şəhər 1 saylı Uşaq İncəsənət Məktəbinin rəsm müəllimi Gülşən Baxşəliyeva tədbir boyu şagirdləri ilə birlikdə şəhidin portretini çəkərək, tədbirin sonunda şəhidin anasına təqdim edib.

Tədbirə dəvət olunan müğənni Ruslan Əkbərov və Leyla Poladqızı şairənin sözlərinə yazılmış musiqiləri ifa ediblər. Hər iki musiqi şəhid Tacəddin İsmayılzadənin xatirəsinə həsr olunub.

Tədbirdə kitabda nəşr olunan poemadan bir hissə və şeirlərdən bir neçəsi də səsləndirilib.

Bir neçə televiziya kanalının çəkiliş etdiyi tədbirin fotoçəkilişini isə Sumqayıt şəhər İcra hakimiyyətinin başçısı Zakir Fərəcovun tapşırığı ilə Xəqani müəllim edib.