Bəybala Mirzəyev:

 "Parçala və hökm sür" siyasəti davam edir...

Rusiya Təhlükəsizlik Şurası sədrinin müavini Dmitri Medvedyev Ermənistanın bu gün Avropa İttifaqına (Aİ) üzvlük prosesinin başlanmasına dair qanun layihəsini təsdiqləməsinə Birinci Pyotrun vəsiyyətlərinə uyğun formada, Azərbaycanı "xoxan" obrazında göstərməklə reaksiya verib, münasibət bildirib.

Belə ki, Medvedyev deyib ki, "Azərbaycan Prezidenti İlham Əliyevin sonuncu sərt bəyanatlarından sonra istisna deyil ki, Ermənistanın Baş naziri Nikol Paşinyan ölkəsinin KTMT-yə üzv olduğunu xatırlayacaq və İrəvan bundan sonra dəstək axtarmalı olacaq".

Rusiyanın keçmiş prezidenti olan D.Medvedyev ironiyasını davam etdirərək, Paşinyana tövsiyələr verməyə çalışıb.

Sitat:

"Saqqalını yeni qırxan Paşinyan ölkəsinin KTMT üzvü olduğunu xatırlasa, təəccüblənmərəm. Yaxud Ermənistan liderlərinin Avropa Birliyi ilə nişanlanmaq niyyətləri fonunda başqa bir varianta əl atıla bilər. İrəvan bu məsələdə birbaşa AB ilə əlaqə saxlaya bilər. Onsuz da onlar Cənnətə namizədlərə pul və silahla kömək etməyi xoşlayırlar. Avropa İttifaqının Ukrayna kimi gözəl təcrübəsi var”.

Medvedyev bu açıqlaması ilə həm Azərbaycana qarşı yaramaz münasibətini ortaya qoyub, həm də Ermənistanı qorxutmağa çalışıb.

Bunlar həmişə belə olublar. Putin də, Medvedyev də, Yeltsin də, keçmiş sovet liderləri və rus çarları da erməniləri həmişə Azərbaycanla, "türk zülmü" ilə qorxudaraq öz təsir dairələrində saxlamağa çalışıblar və onlardan həm Azərbaycana qarşı, həm də Türkiyəyə qarşı, Osmanlıya qarşı alət kimi istifadə ediblər.

Olduqca məkrli siyasətdir, iyrənc taktikadır.

Və görünən budur ki, Kremlin "parçala və hökm sür" siyasəti bu gün də bütün yol və yöntəmləri ilə davam edir.