Ali Aliyev

Hörmətli ABEL MÜƏLLİMİ təbrik edirəm , sağlam uzun ömür arzulayıram . 100 yaşa ay vətənimin layiqli ziyalısı.

Nushaba Abbasova

Təbrik edirəm, canı sağlam, ömrü uzun olsun! İki addımdan birində seçim qarşısında qalanda, Abel müəllimin humanistliyi və dəstəyi ilə hər iki addımı atmışam. Allah razı olsun Abel müəllimdən!

Seker Memmedova

Savadlı alim,BDU-nun sütunlarında olan ,yardımsevər,el ağsaqqalı ,insanlara düzgün yol göstərən və kimsəsizlərə dəstək olan,gözəl keyfiyyətlərə malik olan insan,elmin və insanlığın ən yüksək pilləsində dayanan ABEL müəllimi şanlı yubileyi münasibəti ilə ürəkdən təbrik edir,sağlam ,bərəkətli və uzun ömür arzu edirəm 

Гасан Авшаров

Əzizimiz el ağsakkalı Abel MÜƏLLİM, ad gününüzü, yubileyinizi təbrik, cansağlığı, ixtiralar və çox, çox şanslar arzu edirik.

QEYD. Başlıqlar "Facebook" sosial şəbəkəsindəki başlıqla eynilik təşkil edir.

Fikrət Şiriyev: 

ABEL MƏHƏRRƏMOV -75

5 yanvar Azərbaycan elminin və təhsilinin görkəmli simalarından biri, Bakı Dövlət Universitetinin rektoru(1999-2018), Kimya fakültəsinin dekanı(1993-1999), Üzvi kimya kafedrasının müdiri(2002-ci ildən), AMEA-nın (2007) və Rusiya Elmlər Akademiyasının(2016) həqiqi üzvü, Milli Məclisin deputatı(2005-2015), Əməkdar elm xadimi, “Şöhrət” ordenli akademik Abel Məhərrəmovun anadan olmasının 75 illik yubileyidir.

Abel Məmmədəli oğlu Məhərrəmov 1950-ci il yanvarın 5-də Ağdam rayonunda anadan olmuşdur. O, 1966-cı ildə Qərbi Azərbaycanın Amasiya rayonunun Güllübulaq kənd orta məktəbini medalla bitirdikdən sonra Azərbaycan Dövlət Universitetinin (indiki Bakı Dövlət Universiteti) Kimya fakültəsinə daxil olmuş və 1971-ci ildə oranı əla qiymətlərlə başa vurmuşdur. 1973-cü ildə M. V. Lomonosov adına Moskva Dövlət Universitetində Üzvi kimya ixtisası üzrə əyani aspiranturaya daxil olmuş, 1976-cı ildə MDU-da akademik N. S. Zefirovun rəhbərliyi altında namizədlik (fəlsəfə doktoru) dissertasiyası müdafiə etmişdir. 1976-cı ildən Azərbaycan Dövlət Universitetində baş elmi işçi, baş müəllim, dosent, tədris hissəsinin müdiri, dekan müavini vəzifələrində çalışmışdır. 1991-ci ildə doktorluq dissertasiyası müdafiə etmiş, həmin il Üzvi kimya kafedrasının professoru seçilmiş, 1993–1999-cu illərdə Kimya fakültəsinin dekanı olmuşdur. 1999-cu ilin yanvarında Ümummilli lider Heydər Əliyevin Sərəncamı ilə Bakı Dövlət Universitetinin rektoru təyin edilmiş, 20 ilə yaxın-2018-ci ilin noyabrınadək bu vəzifədə çalışmışdır. Hal-hazırda Üzvi kimya kafedrasının və “Zərif Üzvi sintez” Elmi Tədqiqat Laboratoriyasının müdiridir.

Rektor olduğu müddətdə elmin və təhsilin inkişafı üçün köklü islahatların aparılmasına, BDU-nun dünya reytinq cədvəlində xeyli irəliləməsinə nail olmuşdur. Bu illərdə həmçinin universitetdə iki yeni fakültə, onadək kafedra, Nano Araşdırmalar Mərkəzi də daxil olmaqla otuzadək yeni elmi tədqiqat laboratoriyası, Gənc İstedadlar liseyi, BDU-nun Qazax filialı yaradılmış, universitetin əsas, birinci və ikinci korpusları, Altıağac tədris təcrübə bazası əsaslı təmir edilmiş, Qubada 4 mərtəbəli Tədris-təcrübə və İstirahət mərkəzi, əməkdaşlar üçün ümumilikdə 800 ailəlik 3 yaşayış kompleksi, 10 mərtəbəli Üçüncü tədris korpusu, idman kompleksi, stadion, park, üzgüçülük hovuzu, nəşriyyat, yeməkxana kompleksi, poliklinika və digər tikililər istifadəyə verilmiş, BDU dünyanın bir çox nüfuzlu qurumlarına, o cümlədən Avrasiya Universitetləri, Qaradənizhövzəsi universitetləri, Avropa Universitetləri, Xəzərətrafı Universitetlər Assosiasiyalarına həqiqi üzv seçilmişdir.

Azərbaycan Respublikasının Əməkdar Elm Xadimi (2000) olan akademik Abel Məhərrəmov Azərbaycan Milli Elmlər Akademiyasının (2007) və Rusiya Elmlər Akademiyasının (2016) həqiqi üzvü seçilmiş, “Şöhrət” ordeni (2009), 2-ci dərəcəli “Əmək ordeni” (2019), Heydər Əliyev medalı (2024) ilə təltif edilmişdir. İqtisadi Əməkdaşlıq Təşkilatının “Qızıl medalına” (2000), Rumıniyanın Komandor dərəcəli “Qızıl Ulduz” ordeninə (2006), “Elm və Texnologiya sahəsində İSESCO mükafatı”na (2012) və digər bir çox yüksək Beynəlxalq mükafatlara layiq görülmüşdür. Prezident İlham Əliyevin sərəncamları ilə Azərbaycan Respublikasının Elm, Texnika, Memarlıq, Mədəniyyət və Ədəbiyyat üzrə Dövlət Mükafatlar Komissiyasının və Azərbaycan Milli Ensiklopediyasının redaksiya heyətinin üzvü təyin edilmişdir. Qara Dəniz Hövzəsi Ölkələri Universitetləri Assosiasiyasının prezidenti (2002-2004), Avrasiya Universitetlər Assosiasiyasının vitse-prezidenti (2015-2019) olmuşdur. Latviya Elmlər Akademiyasının nəzdində Beynəlxalq Elmi Şuranın üzvü, Gürcüstan Milli Elmlər Akademiyasının və Türk Dünyası Araşdırmaları Beynəlxalq Elmlər Akademiyasının həqiqi fəxri üzvüdür.

Türkiyə, Rusiya, Rumıniya, Ukrayna, Çin, Albaniya və Qazaxıstanın bir sıra Universitetlərinin Fəxri doktoru, M.V.Lomonosov adına Moskva Dövlət Universitetinin Fəxri professorudur.

Akademik Abel Məhərrəmovun bilavasitə rəhbərliyi ilə 80-dən çox alim dissertasiya işlərini uğurla müdafiə etmişlər. O, 1800-ə yaxın elmi məqalə və tezisin, 70 ixtira, 24 monoqrafiya, 60-dan çox dərslik və dərs vəsaitinin müəllifidir. Onun Web of Science Clarivate Analytics (əvvəl Thomson Reuters) agentliyinin siyahısına daxil olan jurnallarda 500-dən çox elmi məqaləsi çap olunub, «H» indeksi üzrə göstəricisi 34-dür, Scopus beynəlxalq sistemində indekslənən “New Materials, Compounds and Applications” jurnalının baş redaktorudur.

Akademik Abel Məhərrəmov 2005 və 2010-cu illərdə Azərbaycan Respublikası Milli Məclisinin üzvü seçilmiş, on il Azərbaycan-Yaponiya Parlamentlərarası əlaqələr üzrə işçi qrupuna rəhbərlik etmişdir. 20 ilə yaxın Yeni Azərbaycan Partiyasının İdarə Heyətinin və Siyasi Şurasının üzvü olmuşdur.

Görkəmli alim, yüksək səviyyəli elm və təhsil təşkilatçısı olan akademik Abel Məhərrəmovu şərəfli yubileyi münasibətilə təbrik edir, ona can sağlığı və yeni uğurlar arzulayırıq.