Yeni teatr mövsümünün açılışı olub

2020-ci il sentyabr ayının 27-də Azərbaycan tarixi üçün çox önəmli, qürurverici bir hadisənin, hərbi-siyasi, mənəvi əhəmiyyətli səhifənin başlanğıcı gerçəkləşdi. Müqəddəs Vətən  müharibəsi başlandı və Ali Baş Komandan İlham Əliyevin rəhbərliyi ilə qüdrətli Azərbaycan Ordusu dünyaya öz gücünü, döyüş qabiliyyətini, 21-ci əsrin müharibə taktikasını, mücadilə eşqini bəyan etdi.
“Təki Vətən yaşasın” deyib irəli atılan igidlərimiz  “qısas qiyamətə qalmaz” aforizminin gerçəkliyini isbatladılar. Böyük mütəfəkkir Abbasqulu ağa Bakıxanov yazırdı ki, zamanın ruhu ədəbiyyatda əks olunur. 
44 günlük müharibədə Ali Baş Komandanın taktiki-manevr qabiliyyəti, döyüş ruhu, Azərbaycana qarşı yönəlmiş informasiya cəbhəsində Ustad dərsləri yaxın tarixi əks etdirən bədii, sənədli ədəbiyyat nümunələrində  çatdırılıb və çatdırılacaq.
Hər zaman milli-mənəvi dəyərləri, qəhrəmanlıq tarixini, yurd sevgisini təbliğ edən Sumqayıt Dövlət Dram Teatrı da özünün “Missiya”sı ilə 3 ilə yaxındır,  bu missiyaya qoşulub və yaradıcı heyət bununla qürur duyur.
Yeni teatr mövsümünün açılışı da məhz “Missiya” tamaşası ilə gerçəkləşib. Sentyabr ayının 25-də, saat 18:00-da Hafiz Ataxanlının qələmə aldığı, Xalq artisti Firudin Məhərrəmovun quruluş verdiyi “Missiya” qəhrəmanlıq dramı ilə mövsümün açılması kollektivin 27 Sentyabr–Anım gününə ehtiram və sayğısı, tarixi yaddaş qarşısında təzimidir.
Tamaşada 44 günlük Vətən müharibəsi ilə yanaşı 1-ci Qarabağ savaşı da öz əksini tapıb. Xüsusi Təyinatlı Dəstənin mayoru Mübariz Eyvazov Şuşa yaxınlığında ağır yaralanıb komaya düşür və ruhlar aləmində 30 il öncə Şəhid olmuş atası, Milli Qəhrəman Qorxmaz  Eyvazovla görüşür. Ata ilə oğlun söhbətlərində 92-ci ilin döyüşləri xatırlanır, müqayisələr aparılır.
...Və Mübariz Eyvazov Ali Baş Komandannın televizordan verilən “Biz Şuşaya qayıtdıq” sevinc nidasına gözlərini açır.
Tamaşanın quruluşçu rəssamı Elşən Sərxanoğlu, musiqi tərtibatçısı sənətşünaslıq üzrə fəlsəfə doktoru Telman Qəniyevdir. Rolları əməkdar artistlər Rauf Ağakişiyev, İlahə Səfərova, Cəlal Məmmədov, aktyorlar Oktay Mehdiyev, Şəmistan Süleymanlı, Mətləb Səfərli, Habil Xanlarov, Aynur Hümbətova, Məryəm Hüseynli, Rövşən Əsgərov, Ceyhun Məhərrəmli, Ramazan Xanlarov, Etibar Əmirov, Kamran Muradlı, Zaur Şirinov və başqaları ifa edirlər.