İldırım ŞÜKÜRZADƏ: · 
SANKİ DÜNƏN İMİŞ

1970-ci ildə Lənkəran rayonunun Havzava kəndində anadan olmuşam. 1985-ci ildə Havzava kənd səkkizillik (ümumi orta), 1987-ci ildə Kirov (indiki İstisu) qəsəbə orta (tam orta) məktəblərini, 1995-ci ildə isə Azərbaycan Dövlət Pedaqoji Universitetinin tarix fakültəsini fərqlənmə diplomu ilə bitirmişəm.
Pedaqoji fəaliyyətə (əmək fəaliyyətinə 1987-ci ildə başlamış, 1987-1988-ci illərdə Havzava kəndindəki Şirəli Axundov adına sovxozda fəhlə işləmişəm) Lənkəran rayonunun Tatova  məktəbində başlamış, 1995-1996-cı tədris ilində Tatova kənd tam orta məktəbində müəllim işləmişəm. Eyni zamanda Havzava məktəbində də saat hesabı işləyirdim. Hər iki məktəbdə 12 saat (24 saat; 1 stavka 12 saat idi) dərsim var idi və hər iki məktəbdə 120 min manat (240 min) maaş alırdım.
İlk dəfə pedaqoji fəaliyyətə başladığım tədris ilinin (1995-1996) dərs proqramını ən dəyərli nümunə, hər zaman lazım ola biləcək sənəd kimi şəxsi arxivimdə qoruyuram.
1996-1997-ci tədris ilindən etibarən əsas iş yeri olaraq Havzava kənd tam orta məktəbində işləyirəm. 
Sevindirici haldır ki, uyğunlaşdırılmış məktəb olmuş Tatova və Havzava məktəblərinin hər biri üçün sonralar müasir tələblərə cavab verən iki mərtəbəli məktəblər tikilmişdir.
Bu gün pedaqoji fəaliyyətimin 30-cu ilinə qədəm qoyuram. 
30 il! 
30 il bir göz qırpımında keçmiş, sanki hər şey dünən baş vermişdir.
2024-2025-ci tədris ilinə Lənkəran rayonunun A.Əliyev adına Havzava kənd tam orta məktəbinin tarix müəllimi, məktəb həmkarlar təşkilatının sədri, XI sinfin rəhbəri, 13 kitab və 400-ə qədər məqalənin müəllifi, tədqiqatçı-tarixçi, ictimai fəal, sosial maarifləndirici ... kimi qədəm qoyuram!
Bütün təhsil işçilərini, tələbə və şagirdləri, o cümlədən Havzava məktəbinin pedaqoji kollektivini yeni tədris ilinin (2024-2025) başlanması, 15 sentyabr - Bilik günü münasibətilə təbrik edir, hər birinə can sağlığı, uzun ömür və uğurlar arzulayıram!
P. S.  Tatova respublikamızın inzibat-ərazi bölgüsündə rəsmən kənd olsa da, o faktik olaraq kənd yox, Osakücə kəndinin məhəllələrindən biri sayılır.
Digər başlıca məqamlardan biri də odur ki, təzə inzibati-ərazi bölgüsündə kəndin adı təhrif edilərək Tatoba (?) kimi yazılmışdır. Halbuki, kəndin adındakı "tat" sözünün tat xalqı ilə heç bir bağlılığı yoxdur. Tatov talış dilində "isti su" deməkdir.