Ərdoğan dünya ictimaiyyətini İsraili dayandırmağa çağırıb

Türkiyə prezidenti Rəcəb Tayyib Ərdoğan Ankaraya səfərə gələn Qətər əmiri Şeyx Təmim bin Həməd Al Tani ilə görüşüb.

Bu barədə Türkiyə Prezidenti Administrasiyası yanında Kommunikasiya Departamentinin məlumatında deyilir.

İkitərəfli münasibətlərin vəziyyəti, İsrailin Fələstin ərazilərinə təcavüzü, regional və qlobal məsələlər müzakirə edilib.

Söhbət zamanı prezident Ərdoğan qeyd edib ki, İsrail Fələstinin HƏMAS hərəkatının Siyasi Bürosunun sədri İsmayıl Haniyəni öldürməklə Qəzza zolağında atəşi dayandırmaq niyyətində olmadığını bir daha nümayiş etdirib.

Türkiyə liderinin sözlərinə görə, Ankara regiona daimi sülh və sabitlik gətirəcək nizamlanmanın əldə edilməsi üçün səylərini davam etdirir. Dövlət başçısı əlavə edib ki, Türkiyə bu istiqamətdə Qətərlə məhsuldar əməkdaşlığı intensivləşdirmək niyyətindədir.

Türkiyə prezidenti İsrailin həm Fələstin ərazilərinə, həm də Livana hücum edərək bölgədə gərginliyi artırmağa çalışdığına işarə edib.

O, beynəlxalq ictimaiyyəti son günlər daha geniş vüsət alan İsrail təcavüzünün dayandırılması üçün təsirli addımlar atmağa çağırıb.

Prezident Ərdoğan həmçinin bəyan edib ki, Türkiyə Doha ilə siyasi, hərbi, mədəni və hər şeydən əvvəl iqtisadi sahələrdə əməkdaşlığı yeni səviyyəyə çıxarmaqda qərarlıdır.

Türkiyə dövlət başçısı iki ölkə arasında həmrəyliyin daha da möhkəmlənəcəyinə əminliyini ifadə edib.