Azərbaycan alimləri Komrat şəhərində XVIII Beynəlxalq Türk Mədəniyyəti, İncəsənəti və Mədəni İrsin Qorunması Simpoziumunda məruzə ediblər

21-23 may 2024-cü il tarixində Moldova Respublikası Qaqauz Yeri Muxtar Bölgəsinin paytaxtı Komrat şəhərində XVIII Beynəlxalq Türk Mədəniyyəti, İncəsənəti və Mədəni İrsin Qorunması Simpoziumu keçirilib. Simpoziumun əsas təşkilatçıları Türkiyə Cümhuriyyəti Aydın Adnan Menderes Universiteti Türk İncəsənəti və Mədəniyyəti Tətbiq və Araşdırma İnstitutu, Moldova Respublikası Qaqauz Yeri Muxtar Bölgəsi Komrat Dövlət Universiteti və Azərbaycan Respublikası "Miras" Mədəni İrsin Öyrənilməsinə Kömək İctimai Birliyidir. Simpoziumda Azərbaycan, Türkiyə, Moldova, Almaniya, Şimali Makedoniya, Ukrayna, Bolqarıstan, Türkmənistan, Rusiya, Özbəkistan, Albaniya, Belarus, İran, İtaliya və digər ölkələrdən 70-dən çox alim və tədqiqatçı canlı və onlayn məruzələrlə çıxış edib.

Mayın 21-də simpoziumun açılış mərasimində təşkilat komitəsinin sədri Dr. Əhməd Aytac əvvəlki simpoziumlar haqqında məlumat verib, on səkkizinci simpoziumun mövzusundan və əhəmiyyətindən danışıb. Sonra Komrat Dövlət Universitetinin nümayəndəsi Dr. Qalina Mutaf universitet, onun fakultələri və simpoziumun proqramı haqqında məlumat verib. Plenar iclasda Dr. Kristian İohann Henrix "Müasir Böhranlar üçün Atatürkün xarici siyasəti bir model kimi", Dr. Əhməd Aytac "Seyfullah Türksoyun həyatı və yaradıcılığı", Dr. Stepan Bulqar "105-ci ildönümündə Qaqauz Veysəl Ərsevən (Vasili Öküzçü) - musiqişünas və bəstəkar (1919-1977)", Dr. Fariz Xəlilli və Zəminə Rəsulova "Flamand əsilli ispan və rus zabiti Don Xuan Van Halen i Sartinin Azərbaycanda Şirvan xanlığının paytaxtı Fitdağ şəhəri haqqında müşahidələri" mövzusunda məruzə ediblər.

Simpoziumun ikinci bölməsində Azərbaycan Dövlət İqtisad Universitetindən Dos.Dr. Lalə Məmmədova, Dos.Dr. Elfanə Qasımova və Pərvin Namazova "Tekstil sənətində innovasiyalar", üçüncü bölmədə Milli Azərbaycan Tarixi Muzeyindən Dos.Dr. Həbibə Əliyeva "Azərbaycanda Türk-İslam mədəni irsinin dağıdılması və erməni vandalizminin izləri", dördüncü bölmədə Azərbaycan Respublikasının Dövlət Turizm Agentliyindən Dos.Dr. Günel Seyidəhmədli "Xınalıq əhalisinin mədəni landşaftı və "Köç yolu" Tərəkəmə marşrutu üzərində maddi-mədəniyyət abidələri", beşinci bölmədə AMEA Məhəmməd Füzuli adına Əlyazmalar İnstitutundan Dr. Şəhla Xəlilli "Həsən İxfa Əlizadə və "Şuşa şəhərinin tarixi abidələri" əsəri", yeddinci bölmədə "Miras" Mədəni İrsin Öyrənilməsinə Kömək İctimai Birliyindən Dr. Fariz Xəlilli və Məleykə Hüseynova "Xəzər bölgəsinin inkişafında universitet-biznes əlaqəsinin tətbiqi üçün sənaye müəssisələri üzrə pilot kurslar", səkkizinci bölmədə Azərbaycan Respublikası Elm və Təhsil Nazirliyi Coğrafiya İnsitutundan Dr. Natiq Qubadoğlu və Zümrüd Yusifova "Yayılma arealı geniş olan Xələc toponimi", doqquzuncu bölmədə "Miras" Mədəni İrsin Öyrənilməsinə Kömək İctimai Birliyindən Dr. Elmira Abasova və Fidan Quluzadə "Azərbaycan salnaməsində tarix yazan ilk qadınlar", onuncu bölmədə Azərbaycan Dövlət İqtisad Universitetindən Dos.Dr. Lalə Məmmədova, Dos.Dr. Elfanə Qasımova, Nərminə Namazova "Azərbaycan ilmələri", Biləsuvar Gənclər Mərkəzindən Səma Alməmmədli "Yaşıl incəsənətin izində innovativ gənclər" mövzusunda məruzə ediblər.

Sonda iştirakçılara sertifikatlar təqdim olunub.

Azərbaycanlı nümayəndələr əvvəlcə Komrat şəhərinin, sonra isə Qaqauz Yeri Muxtar Bölgəsinin Beşalma, Avdarma və Konqaz kəndlərinin tarixi və memarlıq abidələri ilə yaxından tanış olublar.