“Muzeylər, təhsil və tədqiqat” mövzusunda məşğələ 

Hər il 18 may tarixində dünya muzeyləri Beynəlxalq Muzeylər Şurasının (İCOM) eyni bir devizi altında birləşərək öz peşə bayramını qeyd edirlər. Bu il üçün elan olunmuş “Muzeylər, təhsil və tədqiqat” mövzusu özlüyündə hərtərəfli təhsil təcrübəsinin təmin edilməsində mədəniyyət müəssisələrinin mühüm roluna, daha şüurlu, dayanıqlı və inklüziv bir dünyanın yaradılmasına həsr olunub. Peşə bayramı günündə Azərbaycan Dövlət Teatr Muzeyi bu devizi və Azərbaycan Respublikasında 2024-cü ilin “Yaşıl dünya naminə həmrəylik ili” elan edilməsi haqqında  Azərbaycan Respublikası Prezidentinin  25 dekabr 2023-cü il tarixli Sərəncamını rəhbər tutaraq, həmçinin BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası - COP29 – un cari ildə ölkəmizdə təşkil olunacaq böyük tədbirini dəstəkləyərək 18 may 2024 – cü il tarixində azyaşlılar arasında maarifləndirici məşğələ keçirdi.
“Təbiəti duyaraq sev!” adlı bu tədbir Cəfər Cabbarlı adına Azərbaycan Dövlət Teatr Muzeyinin və 1 nömrəli Uşaq - Gənclər İnkişaf Mərkəzinin birgə təşkilatçılığı ilə baş tutdu. Tədbirdə bəşəriyyəti narahat edən iqlim dəyişiklikləri, onların ətraf mühitə mənfi təsiri, təbiətə qayğının vacibliyi və bu kimi ekoloji problemlər ətrafında söhbət aparıldı. Daha sonra mərkəzin Təsviri sənət qaleriyasının dərnək üzvləri  qlobal problemlər, təbiətin qorunması, yaşıllıqların bərpası ilə bağlı öz dünyagörüşlərinə, təxəyyüllərinə uyğun rəsmlər çəkdilər. Həmçinin iştirakçılara muzey əməkdaşları tərəfindən hazırlanmış insanların təbiətlə rəftarından, ona verdikləri ziyandan bəhs edən videoçarx nümayiş olundu.
Sonda xatirə şəkilləri çəkildi.

Araz Məmmədov