Fidan Əhmədova Afitab:

Mənə ən çox verilən sual "Məşqələ keçirsiz?" sualıdır

Mən məşqələ keçMirəm. Evdə şəraitim yoxdur, məktəbdə də bir neçə il əvvəl direktora dedim bir iki dəfə, başqalarına icazə verdiyi halda, mənə icazə vermədi.

Lap əvvəllər keçirdim məktəbdə digər müəllimlər kimi. Sonra həmin müəllimlərdən birinin bir valideynlə problemi oldu, valideyn şikayət etdi. Ondan sonra bütün müəllimlərə qadağan etdi məktəbdə məşqələ keçməyi. Lakin sonralar bəzi müəllimlər keçməyə başladı. Onlara icazə verdi, mənə yox.

Çünki, bilirdi ki, mən məşqələyə başlasam bütün uşaqlar mənim yanıma axışacaq. Həm öz paxıllığından, həmdə ətrafına cəmləşən bir-biriləri üçün uşaq yığan repititor mafiyasın masson lojasının üzvləri istəmirlər mən məşqələ keçim. Ona görə də qarşıma sədd çəkdilər.

Evdə məşqələ keçmək üçün şəraitim yoxdur. Bir il keçdim evdə. Anam xəstə adamdır. Mən məşqələ keçəndə gedib oturur soyuq otaqda.

Ona görə də keçə bilmirəm evdə.

Ayrıca otaq hazırlamaq üçün də vəsait lazımdır. Ona da gücüm çatmır.

Tam səmimi olaraq onu deyim ki, şəxsən mənə sərf eləmir durub məşqələ otağı üçün o boyda əziyyət çəkim. Niyə?

Mən kreditə girib pul götürəcəm otaq düzətdəcəm ki, nə var nə var, kiminsə uşağı 10cu sinfə qədər kitab üzü açmayıb, 10 cu sinifdə məşqələyə gələcək. Xeyr ola?

Ümumiyyətlə mən sinifdə dərslərimi vicdanla izah edirəm. Mənim məktəbdə öyrətdiyim mövzunu dərsdən sonra məşqələdə keçməyimə ehtiyacım yoxdur. Mən dərsimi elə izah edirəm ki, uşağın məşqələyə ehtiyacı olmasın.

Məşqələyə baxışım budur ki, əgər uşağı evimə məşqələyə çağırıramsa, deməli mən sinifdə yaxşı dərs keçMirəm.

İndiki məşqələlərə gəlin baxaq.

Hər dərs 100-150 test tapşırır hər müəllim. Deməli bir müəllim həftə ərzində 200-300 test verir. Uşağın 5 fəndən məşqələyə getdiyini düşünsək, olur 1000-1500 test.

Və uşaq konkret olaraq çatdıra bilmir bu qədər testi. Psixoloji sarsıntı keçirir, aqressivləşir, daxili narahatlıq və stress yaşayır. Uşaqları aqressiv edən məhz repititorlardır.

Uşaqlar o qədər testi çatdıra bilmədiyi üçün gəlir səhər məktəbdə köçürürlər, sinifdə müəllimdən soruşub yazırlar. Sonra da deyirlər ki orta məktəbdə müəllimlər dərs öyrətmir

Köçürüb aparırlar məşqələyə. Məşqələ müəllimi də 1A, 2B, 3D...və s yoxlayır. Düz çıxanların üstündən keçir. Bilmir ki o düzü sinifdəki müəllimə həll etdirib, ya da sinif yoldaşından köçürüb.

Ayın axırı çatan kimi pulunu alıb qoyur cibinə.

Bir müəllimin orta hesabla 60 məşqələ şagirdi olsa, bu edir bir ayda 60*40=2400 manat.

Hər ay 2400 manat məşqələdən qazanır.

Bu qədər pulla hansı yenilikləri edir, hansı texnologiyaları alır, hansı müasir laboratoriya avadanlıqları alır? Şagirdlərdən ayda bu qədər pul alan müəllimin uşaqları Marsa Aya uçmalıdır, NASAnın əməkdaşları kimi olmalıdır.

Repititorlar illər boyu davam edən ənənəyə sadiq qalaraq bir dəftərə qayda yazdırırlar, bir dənə də test toplu kitabı. Vəssalam. Ancaq məsələ işlədirlər.

Adama deyən lazımdır ki, məktəbdə də eyni şeylər olur da. Bəs onda məşqələnin məktəbdən nə üstünlüyü var ki?

8-9cu siniflər 3 fənnən məşqələyə gedir 10 ay ərzində. Hər fənnə ayda 40 manatdan, edir 400 manat. 3 fənnə il ərzində valideyn 1200 manat pul xərcləyir. 10-11 ci siniflərdə isə hər il 5*400=2000 manat pul xərcləyir.

Repititor müəllimlər isə şagirdlərin verdiyi pullarla gedib ev remont edir, təzə ev alır, maşın alır, bahalı geyimlər alır.

İldə hər uşaq üçün 1200-2000 manat pul xərcləyən valideyn, hər uşaq üçün ildə 100 manat versə məktəbə, məktəblər hər cürə maddi texniki bazasını artırar, dərslərin keyfiyyəti artar.