Argentina İranın müvəqqəti işlər vəkilini persona non qrata elan edib

Argentina hökuməti İranın Buenos-Ayresdəki müvəqqəti işlər vəkilini arzuolunmaz şəxs elan edib və ona 48 saat ərzində ölkəni tərk etməyi əmr edib.

Bu barədə Cənubi Amerika respublikasının Xarici İşlər Nazirliyinin açıqlamasında bildirilib.

Bəyanatda deyilir: "Xarici İşlər Nazirliyi elan edir ki, Argentina İran İslam Respublikasının müvəqqəti işlər vəkili Möhsün Soltani Tehranini 1961-ci il Diplomatik Münasibətlər haqqında Vyana Konvensiyasının 9-cu maddəsinə uyğun olaraq arzuolunmaz şəxs elan edib. O, ölkəni 48 saat ərzində tərk etməlidir".

Nazirliyin məlumatına görə, bu qərar İran Xarici İşlər Nazirliyinin Tehranın Buenos-Ayresin İslam İnqilabı Keşikçiləri Korpusunu (İİKK, İran Silahlı Qüvvələrinin elit bölməsi) terror təşkilatı kimi tanımaq qərarını pislədiyi açıqlamasına cavab olaraq verilib. 30 martda Argentina prezidenti Xavyer Miley-in ofisi hökumətinin İİKK-nı "Terrorçuluq Fəaliyyəti və Maliyyələşdirilməsi ilə Əlaqəli Fərdlərin və Qurumların Dövlət Reyestri"nə əlavə etdiyini açıqlayıb. İran Xarici İşlər Nazirliyi qərarı əsassız və beynəlxalq hüquqa zidd adlandırıb. Tehran iddia edib ki, Buenos Ayres bu addımı "sionist rejimin və ABŞ-ın təbliğatı və təzyiqi altında" atıb.