Xatirə Rəhimli: 

Məmurlar, unutmayın, kəfən cibsiz olur!

Məmurlar, unutmayın, kəfən cibsiz olur!

Keyfiyyətsiz dərmanları ölkəyə gətirməyin!

Cənablar, keyfyyətsiz dərman satışından qazandığınız haram milyonları, milyardları özünüzlə o dünyaya apara biməyəcəksiniz...

Çünki kəfənin cibi olmur, bunu unutmayın.

Şair-jurnalist kimi hər zaman XALQımın, Millətimin danışan dili və haqq səsiyəm.

Yaşadığım soyuq zirzəmidə havam çatmır, nəfəsimdə çatışmazlıq yaranır. Hər gün təngnəfəs oluram, nəfəsim daralır, elə hiss edirəm ki, boğuluram. Neçə ildir ki, nəfəs çatışmazlığından çox-çox böyük əziyyət çəkirəm.

Çox çətindir bu qədər ağır əzablara dözmək.

Nə qədər düşünürəm, çıxış yolu tapmıram.

Allah, daha canım dözmür bu qədər ağrı-acı, bu qədər dərd-qəm, əzab-əziyyət çəkməyə.

İnsan nə qədər zülm çəkər axı?

Aerazolun da, dərmanların da keyfiyyəti olmadığı üçün insanlara müsbət faydası, xeyiri yoxdur. Bilmirəm nə edim?

Çox əlacsız vəziyyətə düşmüşəm.

Onu da qeyd edim ki, 26 illik jurnalistlik fəaliyyətimdə heç bir vəzifəli şəxsin, hansısa məmurun çətirinə sığınmadım. Jurnalist kimi həmişə haqqı müdafiə etdim.

Hər zaman haqq-ədalətin yanında durdum.

Jurnalistlərə tikilmiş 3 binadan məmurlar mənə mənzil vermədi. Bu məmləkətin vəzifəli şəxsləri neçə illərdir ki, məni zirzəmidə çərlədib, ürəyimi qubar edirlər.

Şair-jurnalist kimi neçə illər boyu cəbhə böləgələrinə səfər etdim, vətənin keşiyində duran igid əsgərlərin qarşısında yüzlərlə tədbirlər hazırladım, geniş şəkildə görüşlər keçirtdim.

Hətta elə olub ki, Ağdamın ayrı-ayrı kəndlərində vətənin keşiyini çəkən əsgərlərin qarşısında bir gün ərzində 7 dəfə tədbir keçirmişəm, çıxışlar etmişəm.

Ana vətənimizi qoruyan vüqarlı, qorxmaz, hünərli, cəsarətli əsgər oğulların ürəyində vətənpərvərlik ruhunu aşılamaq üçün yüksək səviyyəli odlu-alovlu çıxışlarım olub.

Bütün Qarabağın, Daşkəsənin, Toğanalının, Murovdağın soyuğundan, qarından, kəskin şaxtasından səhhətimdə neçə ildir ki, çox ciddi problemlər yaranıb.

Ağır formada Bronxial Astma olmuşam.

Neçə ildir ki, bu xəstəlikdən əziyyət çəkirəm.

Bəzi səbəblərə görə tibbi müalicələr də müsbət istiqamətdə qətiyyən heç bir fayda vermir. Səbəblərdən biri budur ki, dərmanlar həm çox keyfiyyətsizdir, həm də saxtadır.

Digər əsas səbəblərdən biri isə neçə ildir ki, zirzəmidə yaşayıb ömür sürməyimdir.

Məmurların biganəliyi, laqeydliyi sayəsində, həmçinin insan həyatını heçə saydıqları üçün, eləcə də neçə illərdir sopsoyuq, divarından kifli qara su axan zirzəmidə yaşadığıma görə və ölkəmizə gətirilən bir çox adda dərmanların keyfiyyətsiz olduğu üçün tibbi müalicənin də heç bir müsbət nəticəsi olmur.

Mənə çox qəribə gəlir, məətəl qalıram ki, yüksək vəzifəli şəxslər, məmurlar mənə qarşı niyə bu qədər haqsızlıq, niyə bu qədər ədalətsizlik, qanunsuzluq edirlər?

Hər gün təngnəfəs oluram, nəfəsim daralır, nəfəs ala bilmirəm, boğuluram elə bil ki.

Bacılarım mənə tez-tez təcili yardım çağırır.

Amma çox təəssüflər olsun ki, dərmanlara lazımi komponentlər vurulmadığı üçün bu keyfiyyətsiz dərmanlar xəstələrə qətiyyən kömək etmir, elə mənə də köməkliyi yoxdur.

Acgöz işbazlar, korrupsionerlər, keyfiyyətsiz dərmanları Azərbaycana niyə gətirirsiniz?

Ay zalım iş adamları, ay insafsız məmurlar, insanların həyatı üzərindən dərman alveri edib nə üçün milyonlar qazanırsınız?

Dərmanlara möhtac qalan insanların taleyi, həyatı üzərindən keyfiyyətsiz, saxta olan dərmanları Azərbaycana gətirib milyonlar, milyardlar qazananlar, bilin ki, sizlər haram yollarla qazandığınız o pul-paranızı xoş gününüzdə xərcləyə bilməyəcəksiniz.

Keyfiyyətsiz dərmanları ölkəyə gətirərək qazandığınız pulu, milyonları xəstəliyinizə xərcləyəcəksiniz. O haram milyonlarınız düşəcəyiniz ağır, çətin, sizləri gözləyən xoş olmayacaq ağrı-acı dolu, əzab-əziyyət çəkəcəyiniz günlərinizə qismət olacaq.

Sözsüz ki, bu, belə olacaq.

Ay zalımlar, çəkəcəyiniz o ağrılı, o acılı günlərinizi zülm etdiyiniz Azərbaycan xalqı da görəcək. O günlərə çox az vaxt qalıb.

Siz inafsız, ancaq pul düşünən işbazlar, bilirsinizmi ki, ölkəyə gətirdiyiniz, bir neçə komponentləri vurulmayan çoxlu sayda keyfiyyətsiz və saxta dərmanlar insanları sağaltmaq əvəzinə onları zəhərləyir.

Zülmlər verdiyiniz bu XALQın ah-naləsi həmişə sizlərlə olacaq, yadınızda saxlayın.

Xalqın ah-naləsindən qaçmaq olmur, bilin.

Alma məzlumun ahını,

Çıxar ahəstə-ahəstə.

Ölkə vətəndaşlarının həyatını keyfiyyətdən uzaq olan dərmanlarla təhlükəyə ataraq cəhənnəmə çevirənlər, bilin ki, heç vaxt Böyük Allah sizləri bağışlamayacaq.

Dərman biznesilə məşğul olanlar, bunu qəti unutmayın ki, illərdir həyatı ilə oynadığınız insanların ah-naləsi sizləri mütləq tutacaq.

Haram yolla qazandığınız o qara pul-para, milyonlar, milyardlar, gözlərinizdən irin-qan olub axacaq, bunu yaxşı düşünün. Çünki siz ürəyi daş olan işbazlar xəstə insanlara göz görə-görə əzab verirsiniz, dərmanlardan istifadə edən insanları incidirsiniz.

Yarıtmaz fəaliyyətinizlə dərmandan istifadə edən xəstə adamları çox keyfiyyətsiz olan dərmanlardan asılı vəziyyətdə saxlayırsınız. Əfsuslar ki, mənfi istiqamətdə apardığınız bu xoşagəlməz işlər hələ də davam edir.

Ölkə vətəndaşlarının sağlamlığını, həyatını, taleyini biznesə çevirən pulpərəstlər, puldan gözü doymayan işbaz, pulgir məmurlar.

Ölkəyə gətirdiyiniz heç bir müsbət keyfiyyəti olmayan yararsız dərmanlarla Azərbaycan XALQına hələ neçə illər zülm edəcəksiniz?

İnsanları xəstə yatağında bundan sonra hələ neçə illər çərlədib çürüdəcəksiniz?

Uşaqların, yeniyetmələrin, gənc, cavan insanların ömrünü keyfiyyəti olmayan saxta dərmanlarla nəvaxtadək yarıda kəsib qıracaqsınız?

Sizlərə "DUR" deyən olacaqmı?

Digər vacib məsələni də vurğulayım ki, Azərbaycanda dərmanların satış qiyməti bir çox ölkələrə nisbətən həddən çox bahadır.

Bu yazıdakı məsələlərlə bağlı Milli Məclisin plenar iclaslarında bəzi deputatlar da kəskin fikir bildirərək narazılıqlarını dilə gətiriblər və bu problemlərin çox tez vaxtda həlli istiqamətində aidiyyəti qurumların ciddi tədbirlər görməsini tələb ediblər.

P. S. Dərman biznesilə məşğul olan pulgir, ürəyi daş olan işbazlar, ölkəyə keyfiyyətsiz dərmanları gətirib insanları zəhərləməyin...

XATİRƏ ƏZİZ Rəhimli

Şair-jurnalist

14 mart 2026