Azərbaycan bir qrup məhkumu Ermənistana təhvil verdi

Azərbaycan Cinayət Məcəlləsinin müxtəlif maddələri ilə ölkəmizdə məhkum edilmiş və cəza çəkən Gevorq Sujyan, David Davtyan, Vigen Euljekçyan və Vaqif Xaçatryanı Ermənistan tərəfinə təhvil verib.

Bu barədə Ermənistanın Baş naziri Nikol Paşinyan öz "Facebook" səhifəsində məlumat verib.

Bu şəxslərin təhvil verilməsi Azərbaycan-Ermənistan sərhədindəki Həkari körpüsündə baş tutub.

Qeyd etmək lazımdır ki, məhbusların təhvil verilməsi həm də Azərbaycan və Ermənistan arasında sülh prosesinin praktik nəticələrindən biridir.

Qeyd etmək lazımdır ki, 2020-ci ildə saxlanılan Vigen Abraham Euljekçyanın döyüş əməliyyatlarında iştirak etmək üçün Livandan muzdlu əsgər kimi Qarabağa gəldiyi müəyyən edilib. 2021-ci ildə Bakı Hərbi Məhkəməsinin hakimi Elbəy Allahverdiyevin qərarı ilə o, 20 il müddətinə azadlıqdan məhrum edilib.

David Tiqrani Davtyan və Gevorq Rubenoviç Sujyan 2020-ci ildə saxlanılıblar. Onlar Azərbaycan Respublikası Cinayət Məcəlləsinin 276-cı maddəsi (casusluq) ilə ittiham olunublar. 2021-ci ildə Bakı Ağır Cinayətlər Məhkəməsi hər iki şəxsə 15 il həbs cəzası verib.

Vaqif Xaçaturyan 29 iyul 2023-cü ildə Ermənistana girməyə cəhd edərkən Laçın sərhəd keçid məntəqəsində Dövlət Sərhəd Xidmətinin əməkdaşları tərəfindən saxlanılıb və AR Cinayət Məcəlləsinin 103-cü (soyqırımı) və 107-ci (əhalinin deportasiyası və ya məcburi köçürülməsi) maddələri ilə ittiham olunub. 17 noyabr 2023-cü ildə 15 il həbs cəzasına məhkum edilib. O, cəzasının ilk beş ilini həbsxanada, qalan hissəsini isə ciddi rejimli cəzaçəkmə müəssisəsində çəkməli olub.