Ermənistan Solovyovun açıqlamaları ilə bağlı Rusiyaya etiraz notası təqdim edib

Rusiyanın Ermənistandakı səfiri Sergey Kopırkin Ermənistan Xarici İşlər Nazirliyinə çağırılıb və ona rusiyalı jurnalist Vladimir Solovyovun açıqlamaları ilə bağlı etiraz notası təqdim edilib.

Bu barədə Ermənistan mediası məlumat yayıb.

"Rusiyanın Ermənistandakı səfiri Xarici İşlər Nazirliyinə çağırılıb və dövlət televiziya kanalında verilən açıqlamalara dərin qəzəb ifadə edən etiraz məktubu alıb. Vurğulanıb ki, bunlar Ermənistan Respublikasının suverenliyinə qəbuledilməz müdaxilə, düşmənçilik aktı və Ermənistanla Rusiya arasında dostluq münasibətlərinin fundamental prinsiplərinin kobud şəkildə pozulmasıdır", - deyə Ermənistan Xarici İşlər Nazirliyinin sözçüsü Ani Badalyanın açıqlamasında bildirilir.

Bu gün səhər saatlarında Ermənistan Parlamentinin sədr müavini Ruben Rubinyan Vladimir Solovyov haqqında sərt bir fikir söyləyərək onu "it" adlandırıb.

"İt hürür, amma karvan irəliləyir". "Bu halda, it rusiyalı iş adamı Samvel Karapetyanın yaxın dostu və həmyerlisi Solovyovdur və karvan davamlı sülh və inkişafa doğru inamla irəliləyən sevimli ölkəmizdir", - deyə o, sosial mediada yazıb.

Xatırladaq ki, Vladimir Solovyov bu yaxınlarda Ermənistanın itirilməsinin Rusiyanın maraqlarına zidd olduğunu bildirmişdi. Bundan əlavə, teleaparıcı təkcə Ukraynada deyil, həm də "Rusiyanın təsir dairəsinin digər bölgələrində, xüsusən də Ermənistanda" "xüsusi hərbi əməliyyatlar"ın aparılmasının zəruriliyini dilə gətirdi.