Qubadlının azad günü – Zəfərə aparan yol

5 oktyabr – Qubadlı şəhəri günü Azərbaycanın dövlətçilik tarixində xüsusi yer tutan, xalqımızın qəhrəmanlıq iradəsini və azadlıq uğrunda mübarizəsini əks etdirən tarixi gündür. Prezident, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində Qubadlının azad olunması təkcə hərbi-siyasi qələbə deyil, həm də milli qürurun və dirçəlişin rəmzinə çevrildi. Prezident İlham Əliyevin sözləri ilə desək: “Qubadlıya öz sahibləri qayıdıb. Qubadlının işğaldan azad edilməsi tarixi hadisə idi. Oktyabrın 25-də Qubadlı şəhərinin azad edilməsi bizim qələbəmizi yaxınlaşdırdı.”
Qubadlı rayonunun işğaldan azad olunması 44 günlük Vətən müharibəsinin dönüş nöqtələrindən biri kimi tarixə düşdü. Azərbaycan Ordusu yüksək peşəkarlıq və fədakarlıq göstərərək şəhəri və onun ətraf kəndlərini düşməndən təmizlədi. Qubadlının azadlığı Azərbaycanın ərazi bütövlüyünün bərpası istiqamətində mühüm addım olmaqla, dövlətimizin qüdrətini və ordumuzun yenilməzliyini bir daha sübut etdi.
İşğal illərində Qubadlı rayonu erməni vandalizminin bütün ağır nəticələrini yaşadı. Rayonun 94 yaşayış məntəqəsi, yüzlərlə sosial və mədəni obyekt, məktəblər, körpülər və məscidlər dağıdıldı. Lakin xalqımız bu torpaqlara qayıdacağı günə olan inamını heç vaxt itirmədi. 2020-ci il 25 oktyabrda həmin inam gerçəkliyə çevrildi.

Minnər Mehrabov,
Masallı rayonu, Sarıcəfərli kənd sakini.