Özbəkistan sərhədçiləri qırğızı güllələyiblər

İki Qırğızıstan vətəndaşı iki ölkənin sərhədində onları saxlamağa cəhd edərkən Özbəkistan sərhədçiləri tərəfindən güllələnib.

Avqustun 25-də Qırğızıstanın hüquq-mühafizə orqanlarına Çatkal rayonunun Ayqır-Jal kəndinin iki sakininin itkin düşməsi barədə məlumat daxil olub.

Üç gün sonra Özbəkistan sərhəd xidməti xəbər verdi ki, avqustun 15-də Özbəkistan, Qırğızıstan və Qazaxıstan sərhədlərinin kəsişdiyi ərazidə onların sərhəd naryadı iki naməlum şəxs tapıb. Özbəkistan tərəfinin məlumatına görə, həmin şəxsləri saxlamağa cəhd edərkən onlar əmrə tabe olmayıblar, bundan sonra sərhəd xidmətinin əməkdaşları atəş açıb. Hər ikisi aldığı yaralardan dünyasını dəyişib.

Meyitlər sentyabrın 1-də Qırğızıstan tərəfinə təhvil verilib və müayinə olunmaq üçün Kerben şəhərinin morquna aparılıb. Sərhəd qurumlarının rəhbərləri razılaşıblar ki, sentyabrın 2-də hadisə yerində birgə araşdırma başlanacaq.

Bundan əvvəl, 2022-ci il mayın 5-də Cəlal-Abad vilayətinin Dobo-Korqon rayonunda Özbəkistan sərhədçiləri üç Qırğızıstan vətəndaşını güllələyiblər. Həmin ilin aprelində Özbəkistan sərhədçiləri dayanmaq əmrinə məhəl qoymayan qaçaqmalçılara atəş açıb, iki nəfər həlak olub. 2024-cü ilin may ayında qırğız sərhədçiləri ilə tacik çobanları arasında atışma olub, bir Tacikistan vətəndaşı ayağından yaralanıb.