Zelenski Ukraynada “Raşizm” terminini qanuniləşdirib

Ukrayna prezidenti Vladimir Zelenski ilk dəfə olaraq qanunvericilik səviyyəsində “Raşizm” anlayışının tərifini təsbit edən “Ukrayna xalqının milli yaddaşının dövlət siyasətinin əsasları haqqında” qanunu imzalayıb.

Bu barədə Ali Radanın saytında yerləşdirilən məlumatda deyilir.

Sənədə əsasən, “Raşizm” “rus nasist totalitar rejimi”nin əsasında duran totalitar ideologiya və praktikaların bir növü kimi şərh edilir. Qanunda qeyd edilir ki, bu ideologiya rus şovinizmi və imperializmi ənənələrinə əsaslanır, həmçinin kommunist və milli sosialist (nasist) rejimlərinə xas olan təcrübələrdən istifadə edir.

Qanunda vurğulanır ki, Rusiya Ukraynaya genişmiqyaslı işğalın əvvəlindən aktiv şəkildə tarixi faktlarla manipulyasiya edir, Ukrayna tarixini təhrif etməyə, “ümumi irs” tezisini irəli sürməyə və müharibəni kvazitarixi povestlərlə əsaslandırmağa çalışır. Yeni qanun bu cür təbliğata qarşı mübarizə alətinə və cəmiyyəti keçmişin vahid dərki ətrafında cəmləşdirməyin bir yoluna çevrilməlidir.

Sənəddə “Raşizm” ifadəsi ilə yanaşı, “Ukraynanın müstəqilliyi uğrunda müharibə”, “Ukrayna xalqına qarşı cinayətlər”, “tarixi anti-Ukrayna təbliğatı” kimi anlayışlar da öz əksini tapıb.