Dövlət Departamenti 1300-dən çox əməkdaşını işdən çıxarmaq qərarına gəlib

ABŞ Dövlət Departamenti iyulun 11-də 1300-dən çox əməkdaşını ixtisar edir.

Dpartament ABŞ-də missiyalarını yerinə yetirən 1107 dövlət qulluqçusu və 246 diplomatik xidmət əməkdaşına ixtisar bildirişləri göndərir.

Associated Press tərəfindən nəzərdən keçirilən Dövlət Departamentinin daxili sənədinə əsasən, diplomatik xidmət əməkdaşları müvafiq bildiriş aldıqdan sonra dərhal 120 gün müddətinə inzibati məzuniyyətə gedəcəklər və bundan sonra onlar rəsmən işlərini itirəcəklər. Əksər dövlət qulluqçuları üçün ixtisar prosesi 60 gün davam edəcək.

Agentliyin istinad etdiyi bildirişdə deyilir ki, Dövlət Departamenti “diplomatik prioritetlərə diqqət yetirmək üçün daxili əməliyyatları sadələşdirir” və ixtisarlar “diqqətlə planlaşdırılıb” və “qeyri-əsas funksiyalara, təkrar və ya artıq bölmələrə”, habelə işçilərin funksiya və məsuliyyətlərinin birləşdirilə biləcəyi şöbələrə təsir göstərir.

Associated Press-in qeyd etdiyi kimi, Dövlət Departamentinin ixtisarları ABŞ Prezidenti Donald Tramp, Dövlət Katibi Marko Rubio və onların Respublikaçı müttəfiqləri tərəfindən bəyənilib, indiki və keçmiş diplomatlar isə bu qərarı tənqid ediblər, çünki bu, “ABŞ-ın təsirini və xaricdə mövcud və yaranan təhlükələrə qarşı durmaq qabiliyyətimizi zəiflədəcək”. Donald Trampın ikinci prezidentlik müddəti başlayandan onun administrasiyası dövlət qulluqçularını ixtisar edir. Eyni zamanda, “The Washington Post”un iyun ayında yazdığı kimi, işdən çıxarılan işçilərin bəziləri kütləvi şəkildə işə bərpa olunmağa başlayıb.