Arutyunyan: Ermənilər sonradan Laçına və Kəlbəcərə köçürülüb

Bakı Hərbi Məhkəməsində keçirilən növbəti prosesdə təqsirləndirilən Arayik Arutyunyan prokurorların suallarını cavablandıraraq Suriya və Livandan gətirilən şəxslərin Azərbaycanın əvvəllər işğal olunmuş ərazilərində məskunlaşdırıldığını təsdiqləyib.

O, Azərbaycanla həmsərhəd rayonlarda - Qoris və Kapan rayonlarında yaşayan Ermənistan vətəndaşlarının bir hissəsinin köçərək o zaman işğal olunmuş Zəngilan, Qubadlı və Laçın rayonlarına yerləşdiyini bildirib və əlavə edib:

"Çünki bu ərazilərdə, xüsusən də kənd təsərrüfatı sahəsində fəaliyyət üçün böyük imkanlar var idi. Köçkünlər əsasən kənd təsərrüfatı işləri ilə məşğul olurdular. Sünik rayonunun coğrafiyasını bilirsiniz. Orada kənd təsərrüfatı üçün geniş imkanlar yoxdur. Zəngilan, Qubadlı, Laçın rayonlarında isə bu sahədə daha çox imkanlar var idi".

A.Arutyunyan bildirib ki, Ermənistandan gələnlər başqa ölkələrdən gələnlərlə müqayisədə məskunlaşmaq üçün xüsusi stimul almayıb: “Biz onlara qarışmamışıq, harada yaşayıb, nə edəcəklərini özləri seçiblər”.

O, Laçın və Kəlbəcər rayonlarında sonradan erməni millətindən olan insanların məskunlaşdırıldığını təsdiqləyib: "Bu, sonradan baş verdi. Əvvəllər Laçın rayonunda ermənilər yaşamırdılar. Bildiyimə görə, Kəlbəcər rayonunda da vəziyyət eyni idi".

Qeyd edək ki, iyunun 20-də Ermənistanın hərbi təcavüzü nəticəsində sülhə və insanlığa qarşı cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozmaq, habelə terrorizm, terrorizmi maliyyələşdirmək, hakimiyyətin zorakılıqla ələ keçirilməsi, zorakılıqla hakimiyyətin saxlanılması və digər cinayətlərdə təqsirləndirilən Ermənistan Respublikası vətəndaşlarının məhkəmə prosesi davam edəcək.