Qazaxıstan rusların ölkəyə girişini sərtləşdirməklə hədələyir

Qazaxıstan Daxili İşlər Nazirliyinin rəhbəri Yerjan Sadenov Qazaxıstan vətəndaşlarının Rusiyaya giriş qaydalarının sərtləşdirilməsinə cavab olaraq xarici vətəndaşlara qarşı güzgü tədbirləri görməyə hazır olduğunu açıqlayıb.

Nazir bu barədə jurnalistlərə parlamentin iclasında bildirib.

Şərhin verilməsinə səbəb Qazaxıstan vətəndaşlarının ölkəyə girişi üçün Rusiyada məcburi RuID mobil tətbiqinin yaxında tətbiqi olub. Sadenov qeyd edib ki, analoji rəqəmsal həll artıq respublikanın özündə də qüvvədədir: “Biz bütün şəraiti yaratmışıq, tətbiq var”.

Rusiya vətəndaşlarına qarşı mümkün cavab tədbirləri ilə bağlı sualı cavablandıran Sadenov vurğulayıb ki, Qazaxıstan beynəlxalq təcrübə və milli təhlükəsizlik prioritetləri əsasında hərəkət edir: "Tədbirlər görülür. İlk növbədə, ölkənin maraqlarına uyğundur. Əgər əcnəbi Qazaxıstana səfər etmək istəyirsə, xahiş edirəm, amma qanunun tələblərinə uyğun olaraq".

Nazirin sözlərinə görə, qərarlar hazırlanarkən həm milli qanunvericilik, həm də digər ölkələrin təcrübəsi nəzərə alınır. O, təsdiqləyib ki, hakimiyyət lazım bildiyi təqdirdə xaricilər üçün də oxşar tələblər qoymağa hazırdır.

Bundan əvvəl Qazaxıstan Xarici İşlər Nazirliyi də Rusiyanın yeni giriş qaydalarına güzgü reaksiyasının mümkünlüyünü istisna etmirdi. Xatırladaq ki, ötən ilin sentyabrında Rusiya Federasiyasının Rəqəmsal İnkişaf Nazirliyi ölkəyə gələn əcnəbilərdən biometrik məlumatların toplanması üzrə eksperiment elan etmişdi. Yenilik mediada müzakirələrə səbəb olub və bəzi nəşrlər tərəfindən faktiki olaraq viza rejiminin tətbiqi kimi qəbul edilib.