ABŞ-də erməni mafiyası dağıdıldı

“Fox News” telekanalı dələduzluq yolu ilə 30 milyon dollar oğurlamaqda ittiham olunan erməni cinayətkar qrupunun Los-Ancelesdə ifşa olunmasının görüntülərini yayıb.

Məlumata görə, 14 erməni əsilli şəxs ABŞ hökumətinin ehtiyacı olanlara yardım üçün ayırdığı on milyonlarla dolları qanunsuz olaraq mənimsəməyə cəhd etməkdə şübhəli bilinir.

ABŞ Daxili Təhlükəsizlik Departamentinin telekanala təqdim etdiyi kadrlar şübhəlilərdən birinin, Uilyam Mak Qrayan təxəllüsü ilə gizlənən şəxsin saxlanıldığı anları əks etdirir. O, Los-Ancelesdəki evində həbs edilib. O, Los-Ancelesdəki evində saxlanılıb.

Müstəntiqlər hesab edirlər ki, Mak Qrayan, COVID-19 yardımı və kiçik biznes dəstəyi üçün təxminən 30 milyon dollar oğurlayan transmilli cinayət şəbəkəsinin təşkilatçısı idi.

ABŞ Daxili Təhlükəsizlik Departamenti qeyd edir ki, əməliyyat zamanı 14 nəfər nəzarətə götürülüb, onların əksəriyyəti artıq ABŞ vətəndaşlığını alıb. Onlar sui-qəsd, pul fırıldaqçılığı və çirkli pulların yuyulmasında ittiham olunurlar.

İstintaq müəyyən edib ki, cinayətkarlar saxta sənədlərdən istifadə etməklə bir sıra uydurma şirkətlər yaradıblar. Oğurlanmış vəsaitin bir hissəsi daşınmaz əmlak və dəbdəbəli əşyaların alınmasına sərf edilib, yerdə qalan pullar isə Ermənistana ötürülüb və bu, izlənməsini çətinləşdirib. Ümumilikdə, məhbuslar federal büdcədən təxminən 47 milyon dollar istəyiblər və bu vəsaitin 30 milyon dollara yaxınını qanunsuz olaraq mənimsəməyə nail olublar.