Simli Kvartetin təqdimatında "Kamera Musiqisi Axşamı"

8 aprel tarixində M.Maqomayev adına Azərbaycan Dövlət Akademik Filarmoniyasının Kamera və Orqan Musiqisi Zalının səhnəsində Azərbaycan Dövlət Simli Kvartetinin “Kamera Musiqisi Axşamı” adlı konserti keçirilib. Proqramda S.Barber simli kvartet b-moll (op.11), F.Schubert 14 saylı simli kvartet “Ölüm və qız”, d-moll səslənib. Hər iki əsər həm səslənmə, həm də texnika baxımdan mürəkkəb olmasına baxmayaraq, ifaçılar çox asanlıqla öhdəsindən gəlmiş oldular.Kvartetin hər bir üzvünün ifa ustalığı, onların daxili hazırlığı və kamilliyi təqdirəlayiqdir. Sırf professionallıq, yetkin bədii zövq, çoxçalarlı səsləndirmə bacarığı və özlərinə böyük tələbkarlıqla yanaşan Azərbaycan Dövlət Simli Kvartetinin bu parlaq konsertini fədəkar əməyin nəticəsi və uğurlu çıxışlarının davamı saymaq olar! Əlbəttə, bütün bu deyilənləri musiqi həvəskarlarının uzun zaman susmayan gurultulu alqışları bir daha sübut etmiş oldu. Belə ki, kvartetin qarşıdan gələn konsertlərdə daha geniş və fərqli repertuar sərgiləyəcəyi gözlənilir.
Qeyd etmək lazımdır ki, Azərbaycan Dövlət Simli Kvarteti 1998-ci ildə yaradılıb. Repertuarı Azərbaycan və xarici bəstəkarların klassik və çağdaş əsərləri ilə zəngindir. Simli kvartetin tərkibi Respublika və beynəlxalq müsabiqələr laureatı Nəzrin Aslanlı (I violin), Xəyalə Abdullayeva (II violin), Azərbaycan Respublikasının Əməkdar artistləri Vaxtanq İmanov (viola) və Aleksey Miltıx (violonçel) kimi dəyərli ifaçılardan ibarətdir.

AZpress.AZ,Minə Türksoy.