Konkurlar "Sərhədçi" Kuboku uğrunda yarışıblar

5-6 fevral günlərində ARAF-in (Azərbaycan Respublikasının Atçılıq Federasiyası) təşkilatçılığı ilə "Sərhədçi" Atçılıq Mərkəzində müxtəlif kateqoriyalar ("E", "L" və "M+") üzrə konkurlar arasında "Sərhədçi" Kuboku uğrunda yarışlar keçirilib. 

ARAF-dan verilən məlumata görə, "E" kateqoriyasında olan konkurlar hündürlüyü 90 sm, "L" kateqoriyadinda 115 sm, "M+" kateqoriyasinda isə 120 sm olan maneələrin üzərindən aşıblar. Qaydalara görə 20 yaşadək olan konkurlar meydana yaş məhdudiyyəti olmayan atların belində, 20 yaşdan yuxarı olan konkurlar isə 6 yaşadək atlarla çıxıblar.

"E" kateqoriyasında 17 idmançı mübarizə aparıb və birinci yeri "Şahzadə" ləqəbli atın konkuru Valeriya Rosenko tutub. İkinci yeri "Nabab De Belou" ləqəbli atın sahibi Gülay Fərzəliyevanin tutduğu bu yarışda ilk üçlüyü "Tibet" ləqəbli atla Ayan Fərəcova tamamlayıb.

14 idmançının mübarizə apardığı "L" kateqoriyadinda isə qalib adını "Şirin" ləqəbli atla yarışa qatılan Ramil İbrahimov qazanıb. 2-3-cu yerləri müvafiq ardıcıllıqla Gülay Fərzəliyeva ("Nabab De Belou" ləqəbli stla) və Aydan Ağayeva ("Zirvə 2" ləqəbli atla) tutub.

8 konkurun mübarizə apardığı 'M+" kateqoriyalı yarışda "Damla" ləqəbli atla meydana çıxan Anar Hümbətov fərqlənib . İkinci yerin sahibi Eqor Morotski ("Astrello" ləqəbli atla) olub. Üçüncü yeri isə "Zirə 2" ləqəbli atla Aydan Ağayeva tutub.

Yarışın sonunda kateqoriyalar üzrə qaliblərə "Sərhədçi" Kuboku, 2-3-cu yerlərin sahiblərinəsə müvafiq medallar və ARSF-in fəxri diplomu təqdim edilib.

İNTİQAM Məmmədov