Mir Çingiz Ağazadə:

Doğum günün mübarəkdir, Ata!

Bu, yeri gəldikcə hansısa media mənsubunun təbriki ola bilərdi. Yaxud fanat kütləsinin bir fərdi tərəfindən yazılan üç-beş kəlməlik təbrik postu da saymaq olardı. Hətta səninlə eyni cəbhədə savaşan media kapitanlarının doğum günü statusuyla da yanaşı oxumaq olardı indi yazacaqlarımı. Fəqət bu, tamam başqa yazıdır. Bu təbrik qısadır, konkretdir. Bu təbrik biraz da sənin jurnalistikamıza vurduğun möhürə bənzəyir.

Doğum günün mübarəkdir, Ata!

Yadıma gəlmir ki, indiyədək heç olmasa, bircə dəfə "Ata" xitabını kiçik hərflərlə yazım. İstər sual verim, istər təbrik edim, istərsə də xahiş, məramım da, niyyətim də, üslubum da dəyişməzdir. Bu xarakterimi səndən qazanmışam!

Uşaqlıqdan indiyə qazandığın uğurların çox kiçik bir qisminə şəxsən yanında şahidlik edə bilmişəm. Ki, məsələn, onlardan birincisi Ulu Öndər Heydər Əliyevlə müsahibədən qayıtdığın günün nəşəsi, xoşbəxtliyi idi. Kimsənin bacarmadığını etmişdin. Kimsənin cürət etmədiyinə nail olmuşdun. Bu sevinc sənin haqqın idi. Məhz sənin! Misalları saymaq olar... Amma mənim elə bir niyyətim yoxdur. Saytlarda istənilən qədər fəxarət dolu müsahibən yer alır...

Hərdən görürəm, kimsə hələ keçən il paylaşdığım doğum günü postuna dişinin dibindən çıxanı yazır, kin qusur, digəri ümumiyyətlə nalayiq kəlmələrlə öz anasının örpəyini murdarlayır... Hələ bir dəfə hansısa özündən bixəbər elan eləmişdi ki, güya mən soyadımdan imtina etmişəm...

Fəqət madam ki, bu həşəratlar öz qurşaqdan aşağı kimlikləriylə qara yaxmaqla məşğuldur, qoy onda mən də bir elan verim. Mən də bir bəyan postu paylaşım...

Birincisi, Mir Şahin Ağayevin oğlu olduğuma görə əsla xəcalət çəkməmişəm. Bu, sizə verdiyim cavabdır. Əksinə, daim qürur duymuşam və fəxr etmişəm! Qısa, konkret, sərt. Aydındır?! Aydın olmalıdır. Ayrı cavab yoxdur!

İkincisi, 12 noyabr istər Konstitusiya günü, istərsə də COP-29-un açılış mərasimi ilə əlamətdar olduğu qədər həm də bu ölkənin ən güclü jurnalistinin doğulduğu tarixdir. Vəssalam!

Üçüncüsü, bütün titullar bir yana, mənə 61 yaşında elə bir jurnalist göstərin ki, atamın uğurlarının cəhənnəm, heç deyilsə, yarısını qazansın! Göstərə bilməzsiniz! Yoxdur elə insan! Bəlkə, bu dövlətə xidmətində ondan daha çox zəhmət çəkmiş, bu ölkənin mövqeyini istər daxili, istərsə də xarici müstəvidə daha qabarıq şəkildə təbliğ edən ayrı bir media kapitanı tanıyırsınız? Ya ondan daha mahir söz ustası?! Gəlin, əyri oturub düz danışaq. Sizin onun haqqında yazdığınız nalayiq kəlmələr parlaq gerçəklərin yanında milçək tullantısı kimi görünür. Yəni görünmür.

Kənardan necə təəssürat bağışladığımı bilmirəm. Ancaq fikrimi soruşası olsanız, bu post bir oğulun atası haqqında paylaşdığı səmimi düşüncələr toplusundan başqa şey deyil. Zənnimcə, hər kəs də belə düşünməlidir. Şübhəsiz, atanı oğlundan yaxşı kimsə tanıya bilməz.

Allah sənə düşmən kəsilənlərin məğlubiyyətini görəcək qədər ömür versin, Ata.

Yekunda...

61-ci doğum günün mübarək! Təkrarən və qürurla!

2024.11.12

Fəxrlə Oğlun Mir Çingiz...