Sərbəst güləşçilərimiz 3 medal qazanıblar

Abdullayevlə Cioyev gümüş, Hacıyevsə bürünc əldə edib

Albaniyanın paytaxtı Tiranada 23 yaşlı güləşçilər arasında idman güləşi üzrə keçirilən dünya çempionatının 6-cı günü Azərbaycan yığması üçün uğurlu olub. Belə ki, sərbəst güləş üzrə komandamızın üç üzvü inamla güləşərək mükafatçıar sırasında yer alıb. Triomuzdan Ruslan Abdullayevlə (61 kq) Arseniy Cioyev (86 kq) yalnız həlledici finalda büdrəyərək gümüş medalla kifayətlənib. 74 kq-da çıxış edən Cəbrayıl Hacıyev isə üçüncü yeri tutmaqla bürünc medala layiq görülüb. Təəssüflər olsun ki, 125 kq-da döşək üzərinə çıxan təmsilçimiz Aydın Əhmədov isə bürünc medal uğrunda görüşdə uduzaraq turnirlə əliboş vidalaşıb.

Yeri gəlmişkən, mundialın 6-ci günü (26 oktyabr) mübarizəyə qatılan daha beş təmsilcimizdən ikisi sabah medal uğrunda görüşə çıxacaq. Bunlardan Bəşir Xaniyev (70 kq) finala yüksəlib və bununla da ən pis halda çempionatın gümüş medalını özünə təmin edib. Əli Tskayev (79 kq) isə təsəlliverici görüşə qatılmaqla bürünc medal uğrunda görüşə çıxmaq imkanı əldə edib. Hər iki güləşçimiz mundialın 7-ci (son) günü medal uğrunda görüşə çıxacaq. Beləliklə, hazırda aktivində 3 (0-2-1) medalı olan sərbəst güləş üzrə U-23 yığmamız medalların sayını 5-ə çatdıra bilər.

Oktyabrın 27-də mundialla yekun vurulub.

İNTİQAM Məmmədov