Vasif Ayan: 

Bir britaniyalı daha nə etməli idi ki, Azərbaycan üçün siz məmnun qalasınız?

Bizim insanlarda belə bir xoşagəlməz xüsusiyyət də var ki, bəzən tanımadığı adam haqqında ələ salıcı, kobud, mənasız fikirlərdən istifadə edir. O adamı tanısa, üz-üzə gəlsə utancından, xəcalətindən yerə girəsidir ha. Bunu da dəqiq bilirəm. Dünən kitab sərgisində naşir Şahbaz Xuduoğlu çox maraqlı bir görüş təşkil etmişdi. 24 ildir Bakıda yaşayan və fəaliyyət göstərən Böyük Britaniya vətəndaşı İan Peart ilə yazarları, oxucuları görüşdürmüşdü. Görüş maraqlı olduğuna görə hətta 1 saatdan da çox çəkdi. Qıcaca İan Peart haqqında onu deyim ki, 2000-ci ildə İngiltərədən Bakıya işgüzar səfər edir. Bakıda tale onu ingilis dili müəllimi, tərcüməçi Səadət İbrahimova ilə tanış edir. Bu artıq əsl ruh adamlarının bir-birini tapması deməkdir. Səadət xanım İan Peartın ürəyini elə fəth edir ki, Azərbaycan adət-ənənələri haqqında heç bir məlumatı, anlayışı olmayan İngiltərə vətəndaşı Bakıda daimi məskunlaşmağa və Səadət xanımla ailə qurmağa qərar verir. İan Peart Bakıda Universitetlərinib birində pedaqoq kimi fəaliyyət göstərir. Eyni zamanda da Səadət xanımla birgə tərcümə işləri ilə məşğul olmağa başlayırlar. İan Peart bir çox azərbaycanlıdan daha çox azərbaycanldır. Çünki o, Nəsimidən Mirzə Ələkbər Sabirə qədər hamısı ilə maraqlanıb, onları mütaliə edir. Hətta Azərbaycan müəlliflərinin kitablarını ingilis dilinə çevirir. Bilirsiniz bu nə böyük fədakarlıqdır? Cəlil Məmmədqulizadədən Kamal Abdullya qədər olan yazıçıların kitabını əcnəbi dilə çevirib, dünyaya çıxarmaq?

Ancaq siz isə, mənim əziz həmyerlilərim ( əlbəttə ki, istisnalar var ) dünən bu kişinin iynə ilə nar yeməyini lağa qoyub, ələ salırsınız. Siz bilirsinizmi ki, bu britaniyalı ailə qurduğu azərbaycanlı xanımın vəfatından sonra nə qədər sarsılıb? Hələ də onu düşünür, onunla tanışlığını taleyin bir hədiyyəsi, xoşbəxtliyi hesab edir. Dünən İan Peartla görüş zamanı xanımı haqqında söz düşəndən gözü dolur, duyğulanırdı. İndi onu həyata bağlayan qadını həyatda yoxdur ancaq buna rəğmən o Bakıda yaşamağa davam edir. Dünən İan Pearta belə bir sual ünvanladım ki, ömrünün sonuna qədər Bakıda qalmağa qərarlıdırmı? 24 ildir ki, artıq burdadır və bu gün onun sevimli qadını ətrafında yoxdur, bu itki onu Bakıdan uzaqlaşmağa vadar etmir ki? O cavabında Azərbaycanı çox sevdiyini, İngiltərəyə qayıdışı özünə qadağan etdiyini söylədi. Yəni ki, artıq o ölkəyə qətiyyən dönmək istəmir. Bakı onun ruhuna yaxındır və ömrünün sonuna qədər burda yaşamağa qərarlıdır. Dünən hər kəs onunla tək-tək görüşüb, ünsiyyət etdi. Çox səmimi, mehriban adamdır. Onu dinləməyə gələn hər kəslə tək-tək görüşüb, ünsiyyət yaratdı. Yaşadığı ərazinin ünvanını da bizə təqdim etdi.

Ona görə də bir insanı qınayanda, ələ salanda çalışın çox diqqətli olun. İan Peart Azərbaycan üçün yaxşı işlər görür. Onun narı necə doğraması və yeməsi öz zövqünə görədir, burda ələ salmalı heç nə yoxdur. İnsanları müzakirə etməyi imkan edib tərgidin. Ölkənizə elə İan qədər fayda verməyə çalışın. Yəni ki, ən azı bu adam bir Azərbaycan xanımını xoşbəxt edib, onunla 20 ildən çox gözəl həyat yaşayıb və ölkənin ədəbiyyatını ingilis dilinə çevirib dünyaya təqdim edib. Bir britaniyalı daha nə etməli idi ki, Azərbaycan üçün siz məmnun qalasınız? Hələ mən onun pedaqoji fəaliyyətinin dərinliyinə varmıram. Nə isə..!