Nurlana Telmanqızı: 

ÖMRÜN 67-Cİ BAHARI

Elçin Şıxlı: "Mənim üçün əsas olan bilirsiniz, nədir? İnsanların gözünə dik baxa bilmək. Kimlərisə görəndə gözlərimi qaçırmıramsa, yaxud gizlənmək istəmirəmsə, bu, mənim üçün böyük şeydir".

Azərbaycan Jurnalistlər Birliyinin sədri, Azərbaycan Respublikasının Əməkdar Jurnalisti, Ayna.az saytı və Ayna TV-nin təsisçisi, “Ayna" — "Zerkalo" qəzetlərinin təsisçisi və baş redaktoru olmuş, Qazax” Xeyriyyə İctimai Birliyinin üzvü Elçin Şıxlının doğum günüdür.

Hörmətli Elçin müəllimi ömrünün 67-ci baharı münasibətilə ürəkdən təbrik edir, can sağlığı, uzun sağlıqlı ömür, yaradıcılığında və şəxsi həyatında yeni-yeni uğurlar arzulayırıq!

Azərbaycan mediasına müasirlik, yenilik gətirən, özünəməxsus ideyaları, qətiyyətli fikirləri ilə seçilən Elçin Şıxlının Azərbaycan jurnalistikasının inkişafında özünəməxsus yeri və nüfuzu var. Yüksək mədəniyyəti, jurnalist etikası ilə seçilən Elçin Şıxlı 1957-ci il oktyabrın 4-də Bakı şəhərində böyük yazıçımız, çox sevdiyim İsmayıl Şıxlının ailəsində anadan olmuşdur. Əslən Qazax rayonunun İkinci Şıxlı kəndinin Şıxlinskilər soyundandır. 1964-cü ildə Bakı şəhəri 190 nömrəli orta məktəbin birinci sinfinə getmiş və 1974-cü ildə həmin məktəbi bitirmişdir.

1974-cü ildə Azərbaycan Pedaqoji Xarici Dillər İnstitutunun ingilis dili fakültəsinə daxil olmuş və 1979-cu ildə həmin institutu ingilis və alman dilləri müəllimi ixtisası alaraq bitirmişdir.

Elçin Şıxlı 1979-cu ilin avqustundan oktyabrınadək Azərbaycan SSR Nazirlər Soveti yanında Xarici Turizm İdarəsi informasiya-reklam şöbəsinin müfəttişi işləmişdir.

1979-cu ilin oktyabrından 1981-ci ilin mayınadək Sovet Ordusu sıralarında hərbi xidmətdə olmuş və həmin müddət ərzində o zamankı Almaniya Demokratik Respublikası ərazisində yerləşmiş sovet ordusu hərbi komendatlıqlarından birində mütərcimlik etmişdir.

1981-ci ilin iyul-avqust aylarında "İnturist" ÜSC Bakı şöbəsində tərcüməçi işləmişdir.

1981-ci ilin avqustundan 1986-cı ilin sentyabrınadək Azərbaycanın Xarici Ölkələrlə Dostluq və Mədəni Əlaqələr Cəmiyyətinin xaricdə yaşayan həmvətənlərlə əlaqələr şöbəsinin referenti olmuşdur.

1986-cı ilin sentyabrından 1988-ci ilin mayınadək Azərbaycan SSR Maarif Nazirliyi Kollekgiyasının katibi vəzifəsində işləmişdir.

1988-ci ilin mayından 1989-cu ilin aprelinədək Sovet Uşaq Fondu Azərbaycan respublika bölməsi İdarə Heyəti aparatında baş referent olmuşdur.

1989-cu ilin aprelindən 1990-cı ilin iyulunadək "Azərbaycan Kommunisti" — "Kommunist Azerbaydjana" jurnalında ədəbi işçi kimi çalışmıdır.

1990-cı ilin iyulundan 1998-ci ilin fevralınadək "Ayna"-"Zerkalo" qəzetləri redaksiyasında baş redaktor müavini, 1998-ci ilin fevralından 1999-cu ilin mayınadək "Al-ver" qəzetinin baş redaktoru, 1999-cu ilin mayından 2001-ci ilin yanvarınadək "Ayna Mətbu Evi" şirkətinin prezidenti vəzifələrində çalışmışdır.

2001-ci ilin yanvarından 2014-cü ilədək "Ayna"-"Zerkalo" qəzetlərinin baş redaktoru olmuşdur. 2016-cı ildə ayna.az saytı və Ayna TV-ni təsis edib.

2006-cı ildən Azərbaycan Jurnalistlər Birliyinin sədridir.

Evlidir. İki övladı var.

Filmoqrafiyasında "Dəli Kür" (film, 1969), Mənə inanın!" (film, 2007), "Cavabsız sual" (film, 2017) filmləri yer almışdır.

Böyük yazıçımız İsmayıl Şıxlı ocağından pərvazlanan Elçin Şıxlı Qazax” Xeyriyyə İctimai Birliyinin fəaliyyətində həmişə yaxından iştirak edir.

Hörmətli Elçin müəllimi doğum günü münasibətilə bir daha təbrik edir, ona gələcək fəaliyyətində bol-bol uğurlar, sevinclər arzulayırıq!