"Qarabağ" AL-nın startında 10 nəfərlik "Tottenhem"lə bacarmayıb

Sentyabrın 26-da Azərbaycan çempionu "Qarabağ"ın da iştirak etdiyi UEFA Avropa Liqasının əsas mərhələ yarışlarına start verilib. Çempionumuz turnirin start matçında İngiltərənin "Tottenhem" klubunun qonağı olub. Londondakı "Tottenhem Hotspur' stadionunda keçirilən və taleyi fransalı referi Villi Delajoya həvalə edilən oyun "Şporlar"ın böyük hesablı qələbəsi ilə bitib - 3:0. Nə qədər təəccüblü də olsa, "Tottenhem" bu qolların hamısını meydanda azlıqda qalandan sonra vurub. 

Matçın 7-ci dəqiqəsində ev sahiblərinin müdafiəçisi Radu Drequşin "Qarabağ"in qapıçı ilə təkbətək çıxan forvardi Juninyoya qarşı kobudluq etdiyi üçün matçın fransalı hakimi Villi Delajo tərəfindən qırmızı kartla meydandan qovulub. Bununla da "Tottenhem" ilk 7 dəqiqədən sonra meydanda azlıqda qalıb. Təəssüflər olsun ki, çempionumuz bu üstünlükdən yararlana bilməyib. Bundan sonra hamı "Qarabağ"ın böyük hesablı qələbə qazanacağını düşündüyü halda, hər şey əksinə olub. Meydanda azlıqda qalan ev sahibləri 12-ci dəqiqədə Brennan Consonun vurduğu qolla matçda hesabı açaraq üstünlük əldə ediblər - 1:0. Təşəbbüsü əldən verməyən "Tottenhem" matçın 53-cü dəqiqədə Pon Sannon vurduğu qolla hesabı 2:0-a çatdırıb.

Qarşılamanın 58-ci dəqiqəsində "Qarabağ"ın penaltı vurmaq və bununla da hesab arasındakı fərqi azaltmaq şansı olsa da, çempionumuz bundan  yararlana bilməyib .Tural Bayramovun vurduğu top qapının yanından kecib. Bunun əvəzində Dominik Solanke 69-cu dəqiqədə dəqiq zərbə ilə hesabı 3:0-a çatdırıb. 

Bununla da, Azərbaycan çempionu  "Qarabağ" 90 dəqiqəlik oyunun 83 dəqiqəsini meydanda say üstünlüyünə malik olsa da, bu şansdan yararlana bilməyib. 10 nəfərlik "Tottenhem" klubu çempionumuzu böyük hesabla məğlub edib.

İNTİQAM Məmmədov