"Tottenhem" Avropa Liqasına "Qarabağ"a qarşı oyunla start verəcək

Ötən mövsüm "köhlən atlar" az qala "Bayer"i tapdalayacaqdı 

Sentyabrın 26-da UEFA Avropa Liqasının əsas qrup mərhələsinin oyunları start götürəcək. Maraqlıdır ki, bu arada Rusiyanın məhşur idman nəşri olan "Sport Ekspress" qəzetində turnirin birinci turu çərçivəsində keçiriləcək "Tottenhem" (İngiltərə) - "Qarabağ" (Azərbaycan) matçı ilə bağlı geniş yazı dərc edilib. Materialı olduğu kimi təqdim edirik.

"Tottenhem" bir ildən sonra yenidən Avrokuboka qayıdıb 

26 sentyabr günü Azərbaycan çempionu "Qarabağ" klubu UEFA Avropa Liqasının əsas qrup mərhələsinin birinci turu çərçivəsində "Tottenhem"in qonağı olacaq. Matç saat 22:00-da Londondakı "Tottenhem Xotspur" stadionunda başlayacaq. Oyunu "Okko Sport" onlayn formatda canlı göstərəcək.

"Tottenhem" - "Qarabağ" matçına bukmekerlər tərəfindən verilən verilən proqnoz

FONBET bukmerlər kompaniyasının analtikləri birmənalı olaraq, ev sahibini matçın favoriti hesab edirlər.  Bukmekerlərin rəyinə görə, oyunda "Tottenhem"in qalib gəlməsi 82 faizlə hesablanıb. Oyunun heç-heçə bitmə şansı 12 faiz, "Qarabağ"ın qalib gəlməsi ehtimalı isə cəmi 6 faiz təşkil edir. Mütəxəssislər hətta oyunun 2:0 və ya 3:0 hesabla "şporlar"ın qələbəsi ilə bitəcəyini də bildirirlər.

"Tottenhem" 2022\23-cü illər mövsümünü İngiltərə Premyer Liqasının yekun turnir cədvəlində 8-ci yerdə bitirdiyi üçün son 14 ildə ilk dəfə olaraq, Avrokuboklardan kənarda qalıb (2008\09-cu illər mövsümündən sonra). 2023\24-cü illə mövsümündə isə "Tottenhem" 4-cü yeri tutub Avrokuboklarda Çempionlar Liqasına vəsiqə qazanmaq üçün sonadək "Aston Villa" ilə rəqabət aparıb və sonda mövsümü 5-ci pillədə bitirməklə Avropa Liqasında çıxış etmək imkanı qazanıb. London klubu bu turnir çərçivəsində "Qarabağ", "AZ", "Roma" və "Elfsborq"u evdə qəbul edəcək, eləcə də "Ferentvaroş", "Qalatasaray", "Reyncers" və "Xoffenxaym" klubunun qonağı olacaq. 

Komanda artıq iki mövsümdür ki, Enca Postekoğlunun rhəbərliyi altında oynayır. Klub ötən mövsümdən fərqli olaraq, bu mövsümə yaxşı başlamayıb. Belə ki, ötən mövsüm ilk 5 turdan sonra turnir cədvəlində "Mançester Siti"dən sonra ikinci olan "Tottenhem" cari mövsümdə isə yalnız 10-u yerdədir. Mövsümün startında "Lester"lə sülh bağlayan (1:1) "şporlar" ardından "Everton"u darmadağın (4:0) etdiyi halda 3 və 4-cü turlarda "Nyukasl" və "Arsenal"a eyni hesabla uduzub - 1:2. 5-ci turda isə "Koventri"ni (2:1) udmaqla azarkeşlərini sevindirə bilib. Daha sonra isə Liqa Kubokunda "Brenford"u üstələyə bilib - 3:1. 

Rəqib "Qarabağ" klubuna gəlincə, qəzet yazır: Ağdamlılar ötən mövsümü qızıl dublla bitiriblər. "Qarabağ" Azərbaycan çempionatını 11 dəfə udmaqla rekorda imza atıb. Klub cari mövsümdə də milli çempionata liderlik edir. 5 oyundan sonra yarış cədvəlinə vahid liderlik edən "Qarabağ" ən yaxın izləyicisi olan və bir oyun artıq keçirən "Sabah"ı 1 xal geridə qoyur.

Qəzet yazır ki, 2014\15-ci illər mövsümündə Çempionlar Liqasında debüt edən "köhlən atlar" son 10 ildə müntəzəm olaraq Avrokubok yarışlarında çıxış edir. Bu illər ərzində "Qarabağ" bir dəfə ÇL-nın, bir dəfə isə Konfrans Liqasının qrup mərhələsində mübarizə aparıb. Qurban Qurbanovun komandası bu ildən yeni formatda keçirilən Avropa Liqasında "Tottenhem", "Bude-Qlimt", "Elfsborq" və "Olimpiakos"un qonağı olacaq, "Malme", "Ayaks", "Lion" və Rumıniyanın "FKSB" klubunu isə evdə qəbul edəcək.

Azərbaycan çempionu bu ilin yayında UEFA Çempionlar Liqasının qrup mərhələsinə düşməyə cəhd edirdi. Əvvəlcə Cəbəllütariqin "Linkoln" klubu üzərində qələbə (2:0, 5:0) çalan "Qarabağ" ardından Bolqarıstanın "Lidpqorets" klubunu üstələyib, Evdə 1:2 hesabla uduzan ağdamlılar səfərdə keçirdiyi cavab matçında 7:2 hesabla qalib gələrək pley-offa adlayıb. Lakin "Qarabağ" bu mərhələdə Zaqreb "Dinamo"sunu keçə bilməyib (0:3, 0:2). Bu oyuna qədər rəqib qapılarına 15 qol vuran "Qarabağ" "Dinamo"nun qapısına yol tapa bilməyib.

Xatırladaq ki, Qurban Qurbanovun komandası ştən mövsüm Avropa Liqasında pis təsir bağışlamayıb. Belə ki, "Bayer", "Molde" və "Xeken" kimi klublarla mübarizə apardığı qrupda ikinci yeri tutaraq, pley-offa çıxan "Qarabağ" bu mərhələdə Portuqaliyanın "Braqa" klubunu (4:2, 2:3) mübarizədən çıxararaq, 1\8 finalda yenidən  məğlubedilməz hesab edilən "Bayer"lə qarşılaşıb. Azərbaycan çempionu leverkuzenlilərlə hər iki oyunda əsil qəhrəmanlıq nümayiş etdirib. Bakıda keçirilən oyunda "Qarabağ" 2:0 öndə olduğu və "farmaseplər"in məğlubiyyətsiz seriyasına son qoya biləcəyi halda Patrik Şik son dəqiqələrdə hesabı bərabərləşdirib və "Bayer"i məğlubiyyətdən xilas edib. Leverkuzendə keçirilən cavab matçında da "Qarabağ" "Bayer"ə oxşar həyacan yaşadıb. Ağdamlılar hətta meydanda say azlığında qalmalarına rəğmən hesabda 2:0 irəli çıxmağı bacarıblar. Beləliklə, "Qarabağ" "Bayer"i tapdalayacağı bir zamanda leverkuzenlilər 3 qol vurmaqla oyunun taleyini öz xeyirlərinə həll edə biliblər. 

"Tottenhem" - "Qarabağ" matçında tərəflərin itkiləri

Bu qarşılaşmada "şporlar" Rişarlison, İb Bissuma və Uilson Odorberin xidmətindən yararlana bilməyəcək. "Qarabağ"dan isə iki qolkiper - Amin Ramazanov və Şahruddin Maqomedaliyev meydana çıxa bilməyəcək. 

"Tottenhem"lə "Qarabağ" arasındakı görüşlər

Bu klublar tarixində iki dəfə qarşılaşıblar. Oyunlar 2015-ci ildə Avropa Liqasının qrup mərhələsində baş tutub. "Uayt Xart Leyn" stadionunda baş tutan ilk oyunda londonlular Riçard Almeydanın penaltidən vurduğu bir qola Son Xın Minin dublu və Erik Lamelin vurduğu qolla cavab veriblər - 3:1. Tofiq Bəhramov adına stadionda keçirilən cavab matçında isə Harri Keynin vurduğu yeganə qol matçın taleyini həll edib - 0:1. 

Hər iki komanda hücum etməyi sevir. Hazırda "Tottenhem" İngiltərə Premyer Liqasında daha çox qol vuran beş klubdan biridir. "Qarabağ" isə bu baxımdan Azərbaycan çempionatında yalnız "Sabah"la müqayisə edilir. Bütün hallarda Qurban Qurbanovun yetirmələrinin "Braqa" və "Bayer"lə məhsuldar oyunlarını yaddan çıxarmaq olmaz. Bu isə o deməkdir ki, "şporlar"la "köhlən atlar"ın London görüşü darıxdırıcı olmayacaq. 

Hazırladı: İNTİQAM Məmmədov