Sumqayıt Dövlət Dram Teatrında yeni mövsümə...

Sumqayıt Dövlət Dram Teatrında yeni mövsümə hazırlıqla bağlı iclas keçirilib. Teatrın direktoru Samir Şəfiyev qeyd edib ki, ötən mövsümdə təhvil verilən və müxtəlif tamaşaçı kontingentinin mənəvi tələbatına, bədii - estetik zövqünə xidmət edən üç tamaşamız repertuarda mühüm yer tutacaq. 
S.Mrojekin "Mühacirlər" əsəri Ümid Abbasın quruluşunda "-1" kimi təqdim olunub. Fuad Cavadzadə 44 günlük Vətən müharibəsinə həsr edilmiş və Əməkdar incəsənət xadimi Əli Əmirlinin qələminin məhsulu olan "Xeyir xəbər" tamaşasını uğurla təhvil verib. Rejissor Fuad Kazımov isə D.Urban  "Şoma və Fruji" tamaşasını uşaq və yeniyetmələr üçün hazırlayıb.
Direktor eyni zamanda sentyabrın 30-da teatrın baş rejissoru, Xalq artisti Firudin Məhərrəmovun 65 illiyinə hazırlığı da xatırlatdı. Habelə Sumqayıtın şəhər statusu almasının 75 illiyi ilə bağlı möhtəşəm ümumşəhər tədbirinə də teatr kollektivinin töhvə verəcəyini dilə gətirdi.
Teatrın baş rejissoru, Xalq artisti, Prezident mükafatçısı, Qızıl Dərviş mükafatı laureatı Firudin Məhərrəmov Georgi Xuqayevin "Varlı ev" dramının Mədəniyyət Nazirliyinin sifarişi ilə hazırlandığını və oktyabrın 10-na qədər təhvil veriləcəyini bildirib.
Bildirildi ki,  Əməkdar mədəniyyət işçisi Vasif Məmmədov kiçik tamaşaçılar  üçün  "Sehrin gücü" əsərini hazırlayacaq.
Eyni zamanda Qərbi Azərbaycan İcmasının sifarişi ilə yazıçı-dramaturq Hidayət Orucovun "İrəvanda nəyim qaldı" əsəri üzərində yaradıcılıq prosesi gedir. 
Böyük Türk dünyasının ünlü yazarı Çingiz Aytmatovun "Dəniz kənarı ilə qaçan Alabaş" povesti əsasında səhnələşdirdiyi və quruluş verdiyi "Ümid sahili" tamaşasının da ilin sonuna təhvil veriləcəyini bildirən Xalq artisti yubiley və ümumşəhər tədbirləri ilə bağlı da düşüncələrini bölüşdü.
İclasda 2024-2025-ci mövsüm illərində qastrol səfərlərinin də planlaşdırıldığı açıqlandı.
Belə ki, Mədəniyyət Nazirliyinin təşəbüsü ilə Sumqayıt Dövlət Dram Teatrının
 repertuarında önəmli yer tutan "Zülmətdə nur", "Xəzinə" və "Missiya" tamaşaları ilə müxtəlif bölgələrə qastrol səfərləri təşkil olunacaq.