Xirosima və Naqasakiyə atom bombasının atılmasından 79 il ötür

Xirosima və Naqasakinin atom bombasının atılmasından 79 il keçir. ABŞ 1945-ci ildə avqustun 6-da və 9-da Yaponiyanın bu şəhərlərinə atom bombası atdı.

Bombalama İkinci Dünya Müharibəsinin son mərhələlərində ABŞ Silahlı Qüvvələri tərəfindən həyata keçirilib.

6 avqust 1945-ci ildə təxminən səhər saat 08:15-də Amerika Hərbi Hava Qüvvələrinin B-29 təyyarəsi o vaxt 255 min nəfər əhalisi olan Xirosimaya Kiçik Oğlan bombası atdı.

Partlayışın qeydə alınmış gücü 13 kiloton, tam dağılma radiusu 1,5 kilometr olub. Tərkibində uran olan bomba Xirosimanın 70 faizini məhv etdi. 90 min evdən 62 mindən çoxu dağılıb.

Nüvə partlayışının birbaşa təsirindən 80 min insan öldü və 1945-ci ilin sonuna qədər qurbanların ümumi sayı 200 min nəfər oldu. Episentrdə temperatur təxminən 3 min dərəcəyə çatıb.

Yardım göstərmək üçün şəhərə gələnlər də radioaktiv yağışın təsirindən ölüblər.

Xirosimaya atom hücumundan sonra ABŞ atom bombasından istifadə edən ilk ölkə kimi tarixə düşdü.

Üç gün sonra, saat 11:02-də Naqasaki şəhərinə 500 metr hündürlükdən 21 min ton trotil ekvivalentində olan Fat Man atom bombası atıldı.

240 min əhalisi olan Naqasakidə baş verən partlayışda 74 minə yaxın insan həlak olub. Evlərin 36%-i tamamilə dağılıb.

Nüvə zərbələri nəticəsində ölənlərin ümumi sayı Yaponiya hakimiyyəti tərəfindən 500 min nəfər olaraq təxmin edilir.

Yaponlar hər iki nüvə partlayışının sağ qalan qurbanlarını “hibakuşa” adlandırırlar.

Sonrakı illərdə sağ qalanların çoxu leykemiya, xərçəng və ya radiasiyanın digər yan təsirləri ilə üzləşdi.

Atom bombalarından istifadə İkinci Dünya Müharibəsinin “dönüş nöqtəsi” hesab olunur. 1945-ci il avqustun 15-də İmperator Hirohito Yaponiyanın İkinci Dünya Müharibəsində Müttəfiqlərin şərtləri ilə qeyd-şərtsiz təslim olduğunu elan etdi. İkinci Dünya Müharibəsinin rəsmi bitmə tarixi Yaponiyanın qeyd-şərtsiz təslim olma aktını imzaladığı 2 sentyabrdır.

Xirosima və Naqasakiyə atılan atom bombaları təsirlənmiş ərazidə bütün bitki və təbii həyatın məhvinə səbəb oldu.

Atom partlayışının enerjisi təxminən 2 kvadrat kilometr ərazidə bütün binaları, canlıları və təbiəti yandırdı, atmosferə atılan nüvə hissəciklərinin təsirini bu gün bölgənin sularında görmək olar.

Xirosimada Sülh Memorial Parkı yaradılıb və burada Xirosima qurbanlarının abidəsi var.

Naqasaki Atom Bombası Muzeyi şəhərin atom bombası ilə vurulmasından bəhs edir.

Məşhur “Sülh Memorialı” və ya “Genbaku Qübbəsi” və ya sadəcə olaraq “Atom Qübbəsi” bombalanmadan əvvəl Xirosima Ticarət və Sənaye Palatasının binası idi. .

Doqquz ölkə nüvə arsenalına malikdir: ABŞ, Rusiya, İngiltərə, Fransa, Çin, Hindistan, Pakistan, Şimali Koreya və İsrail. Bu barədə Stokholm Beynəlxalq Sülh Araşdırmaları İnstitutunun (SIPRI) 2023-cü il hesabatında deyilir.