HƏMAS Siyasi Bürosunun rəhbəri İsmayıl Haniyənin QƏTLİ

HƏMAS Siyasi Bürosunun rəhbəri İsmayıl Haniyə Tehranda qaldığı iqamətgahın birbaşa raketlə vurulması nəticəsində öldürülüb. 

Səhər İranın “Tasnim” və “Mehr” agentlikləri HƏMAS Siyasi Bürosunun rəhbəri İsmayıl Haniyənin Tehrandakı iqamətgahına hücum nəticəsində həlak olduğunu bildirib. Onunla birlikdə mühafizəçisi də öldürülüb.

Ərəbdilli Al Arabiya və Al Hadath telekanallarının mənbələri xəbər verir ki, İsmayıl Haniyə gecə saat 2:00-da yatdığı evə birbaşa raket zərbəsi nəticəsində "yataqda" ölüb. .

HƏMAS rəsmi bəyanatında Siyasi Büro rəhbərinin ölümünü təsdiqləyərək insidentdə İsraili günahlandırıb.

İsmayıl Haniyə İranın yeni prezidenti Məsud Pezeşkiyanın bir gün əvvəl, iyulun 30-da keçirilən andiçmə mərasimində iştirak etmək üçün Tehrana gəlib.

İslam İnqilabı Keşikçiləri Korpusu Haniyənin ölümünü təsdiqləyib və onun öldürülməsinin şərtləri ilə bağlı araşdırma aparıldığını bildirib.

İran Məclisinin Milli Təhlükəsizlik Komissiyası Həniyənin qətli ilə bağlı təcili iclas keçirib.

İsrail qruplaşmanın siyasi liderinin ölümü ilə bağlı rəsmi açıqlama verməyib.

HƏMAS Siyasi Bürosunun sədr müavini Musa Əbu Mərzuk deyib ki, Haniyənin qətli cavabsız qalmayacaq.