Almaniya bu şəhərin bərpası üçün 10 milyon avro ayırır

İyulun 8-də Rusiyanın hücumu nəticəsində qismən dağılmış Kiyev Oxmatdıt xəstəxanasını bərpa etmək üçün Almaniya Ukraynaya 10 milyon avro ayırır.

Almaniyanın İqtisadi Əməkdaşlıq və İnkişaf naziri Svenja Şulz "Rheinische Post" qəzetinə müsahibəsində deyib: "Biz Ukraynada xərçəng xəstələri üçün bu müalicə yerinin artıq mövcud olmaması faktını qəbul etməməliyik və etməyəcəyik". 

Ayrılan pullar digər donorların və ianəçilərin vəsaiti ilə birlikdə xəstəxananın tez bir zamanda işlək vəziyyətə gətirilməsi və binanın qışda istifadəyə hazırlanmasına sərf olunacaq. Nəşr yazır ki, söhbət xüsusilə xəstəxananın fasadlarının, müalicə otaqlarının, eləcə də elektrik və istilik təchizatının təmiri və saxlanmasından gedir.

Şulzenin sözlərinə görə, uşaq xəstəxanasının dağıdılması “Rusiyanın bu işğalçı müharibəni nə qədər amansız və qeyri-insani şəkildə apardığını” göstərir. Nazir əlavə edib ki, Rusiyanın Ukraynaya genişmiqyaslı işğalından “ən çox” uşaqlar əziyyət çəkir.

Kiyevdəki Oxmatdıt uşaq xəstəxanası "çox güman ki" birbaşa Rusiyanın X-101 raketi ilə vurulub. Bu qənaətə BMT-nin İnsan Haqları İdarəsinin ekspertləri gəlib, videoyazıları təhlil edərək, dəymiş ziyanı yerindəcə araşdırıblar.