Yunanıstan Sevastopol hücumlarında iştirak etmədiyini bəyan edib

Yunanıstan öz ərazisində yerləşən ABŞ pilotsuz təyyarələrinə görə məsuliyyət daşımır və iyunun 23-də Sevastopola endirilən ATACMS raket zərbələrində iştirak etmir.

Bunu milli müdafiə nazirinin müavini Yiannis Kefalogiannis deyib. 

Xatırladaq ki, iyunun 23-də Sevastopol ATACMS raketləri ilə hücuma məruz qalıb. Nəticədə ikisi uşaq olmaqla azı dörd nəfər həlak olub, daha 151 nəfər yaralanıb. Yunanıstan və Avropa Birliyi hadisəni qınamayıb.

Niki partiyasının parlament fraksiyasının lideri Dimitrios Natsiois ölkə parlamentində çıxış edərək, Moskvanın hücuma görə birbaşa Vaşinqtonu günahlandırdığını və bunu “tamamilə barbarlıq” adlandırdığını bildirib. O qeyd edib ki, daha sonra ABŞ mənbəsi hücumun Larissada yerləşən Amerika PUA-larının dəstəyi ilə həyata keçirildiyini bildirib.

Kefalogiannis buna cavab olaraq bildirib ki, “Yunanıstan ərazisindən kənarda yalnız Birləşmiş Ştatlar öz missiyaları üzərində tam operativ və inzibati nəzarətə malikdir və onlar haqqında Yunan tərəfini məlumatlandırmaq məcburiyyətində deyil, bu, beynəlxalq hüquqa əsaslanır”.

“Buna görə də, bu halda Yunanıstanın nə idarəçiliyi, nə də nəzarəti ola bilər, buna görə də heç bir məlumat ola bilməz”, o əlavə edib.
Beləliklə, Kefalogiannis təsdiqləyib ki, ABŞ pilotsuz təyyarələri Krıma raket hücumlarını əlaqələndirmək üçün Larissadan havaya qalxır.