“Kitabi-Dədə Qorqud” abidəsinin on illiyi ilə əlaqədar ekskursiya təşkil edildi

Bu gün, 13 dekabr tarixində “Kitabi-Dədə Qorqud” abidəsinin açılışından on il ötür. Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasının Oxuculara xidmət şöbəsinin əməkdaşları kitabxananın  fəal oxucuları – BDU-nun və Azərbaycan Dövlət İqtisad Universitetinin (UNEC) tələbələri, könüllülər və gənclər üçün Dədə Qorqud parkına ekskursiya təşkil etdilər. 
Kitabxananın əməkdaşı Lalə Səlimova bildirdi ki, “Kitabi-Dədə Qorqud” dastanı bir müqəddimə və on iki boydan ibarətdir. Dilimizin, ədəbiyyatımızın, dastan yaradıcılığımızın və mədəniyyətimizin tarixini öyrənməkdə “Kitabi-Dədə Qorqud” böyük əhyəmiyyət kəsb edir. 
Kitabxananın əməkdaşı Gülnarə Cəlilova qeyd etdi ki, Azərbaycan Respublikasının Prezidenti İlham Əliyevin Sərəncamı ilə 2013-cü ilin 13 dekabr tarixində Bakıda Dədə Qorqud parkının və heykəlinin açılışı olub. Açılışda iştirak edən cənab Prezident bu sözləri söyləyib: “Bu, mənim millətimdir, bu mənim xalqımdır, mən Dədə Qorqud nəvəsiyəm”.                             
Ekskursiya iştirakçıları abidənin önünə gül dəstələri qoyaraq xatirə şəkilləri çəkdirdilər.