Ərdoğan: Türkiyə İsrailə təzyiq etməyə davam edəcək

Prezident Rəcəb Tayyib Ərdoğan Türkiyə Xarici İqtisadi Əlaqələr Şurasının Baş Assambleyası və Ustalara Hörmət Mükafatı Mərasimində çıxış edib.

Baş nazir Benyamin Netanyahu administrasiyası Qəzza zolağında qətliamı bitirənə qədər Türkiyə İsrailə ticarət və diplomatiya sahəsində təzyiq göstərməyə davam edəcək. Bunu Türkiyə Xarici İqtisadi Əlaqələr Şurasının (DEİK) Baş Assambleyası və Ustalara Hörmət Mükafatı mərasimində çıxışı zamanı prezident Rəcəb Tayyib Ərdoğan deyib.

Türkiyə lideri qeyd edib ki, Ankara Türkiyənin xeyrinə çalışan, ixracatla məşğul olan, sərmayələrini artıran, Türkiyə iqtisadiyyatına etimad göstərən, “Türk əsri”nin qurulmasına töhfə verən hər kəsə dəstək verir.

Onun sözlərinə görə, 2023-cü ilin may ayında 57 milyard dollara çatan illik cari kəsir mart ayında 31,2 milyard dollara düşüb. “İnanıram ki, cari kəsirdə yaxşılaşma davam edəcək”, - Türkiyə lideri vurğulayıb.

Prezident Ərdoğan qeyd edib ki, iqtisadi proqramın prioritet istiqaməti inflyasiyanın birrəqəmli səviyyəyə endirilməsi ilə türk xalqının rifahının yaxşılaşdırılmasıdır. “Biz inflyasiyanın müvəqqəti rahatlama deyil, daimi əsaslarla azaldılmasına sadiqik. Ümid edirəm ki, bütün dünyanın keçdiyi bu ağrılı dövrü Türkiyə və Türkiyə iqtisadiyyatı üçün tarixi tramplinə çevirəcəyik”, - deyə Türkiyə lideri bildirib.

Prezident bildirib ki, illik inflyasiyanın may ayında ən yüksək həddə çatacağı və daha sonra sürətlə azalmağa başlayacağı proqnozlaşdırılır. “İlin ikinci yarısından biz deinflyasiya dövrünə qədəm qoyacağıq. Biz fiskal siyasət vasitəsilə əlavə inflyasiya təzyiqinə yol verməyəcəyik”, - deyə o, izah edib.

Bundan başqa, prezident Ərdoğan sənaye siyasətində yeniliklərin tətbiqini açıqlayıb.

"Dövlət sektorunda qənaət və səmərəlilik tədbirləri paketi vasitəsilə biz investisiyaların azaldılmasını prioritet sahələrə yönəldəcəyik" deyib.