Slovakiya Ukraynanın NATO-ya üzvlüyünə qarşı çıxıb

Slovakiyaya neytral Ukrayna lazımdır və onun NATO-ya qəbuluna qarşı çıxacaq.

Bunu baş nazir Robert Fiko deyib. Onun sözlərinə görə, Ukraynanın NATO-ya üzv olmaq istəmək və bu istəyini səsləndirmək hüququ var. Amma bu o demək deyil ki, o, əslində alyansa üzv olacaq.

“Bu, onların sərbəst qəbul etdiyi qərar olacaq. Biz deyirik ki, parlamentdə ratifikasiya etməyəcəyik, çünki Slovakiyaya neytral Ukrayna lazımdır. Ukrayna NATO-ya üzv olarsa, Slovakiyanın maraqları təhlükə altına düşəcək”, - deyə Fiko izah edib.

Eyni zamanda, slovak siyasətçi vurğulayıb ki, Bratislava Ukraynanın Avropa İttifaqına qəbul edilməsi ideyasını dəstəkləyir və hesab edir ki, bununla bağlı danışıqlar mümkün qədər tez başlamalıdır.

2022-ci il fevralın sonunda Vladimir Zelenski ölkənin Aİ-yə daxil olması üçün ərizə imzalayıb və Brüsseli bu prosesi sürətləndirilmiş prosedurdan istifadə edərək dərhal başlamağa çağırıb. Avropa Komissiyası Ukrayna və Moldovaya birliyə daxil olmaq üzrə danışıqlara başlamaq üçün bir sıra ilkin şərtlər yerinə yetirilməklə namizəd ölkə statusunun verilməsini tövsiyə edib.

Eyni zamanda, “The New York Times” öz mənbələrinə istinadən yazıb ki, iyulda Vaşinqtonda keçiriləcək sammit zamanı Ukrayna NATO-ya dəvət edilməyəcək. Qəzetin yazdığına görə, alyans yeni üzv qəbul etməyi planlaşdırmır, ona görə də genişmiqyaslı münaqişəyə cəlb oluna bilər.

Öz növbəsində, Dövlət Departamentinin mətbuat xidmətinin rəhbəri Metyu Miller bildirib ki, Ukrayna öz ərazisində hərbi əməliyyatlar aparıldığı müddətdə NATO-ya üzv ola bilməyəcək.