Mərkəzi Gömrük Hospitalında maarifləndirici təlim keçirilib 

24 yanvar 2024-cü ildə Mərkəzi Gömrük Hospitalında Azərbaycan Respublikası Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin təşkilatçılığı ilə “Effektiv iş mühitinin formalaşmasında ünsiyyət və vaxtın idarə edilməsinin əhəmiyyəti” mövzusunda maarifləndirici təlim keçirilib. Dövlət Gömrük Komitəsinin Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev təlim iştirakçılarını salamlayaraq, müxtəlif mövzularda keçiriləcək təlimlərin işin təşkilində və mühitinin formalaşmasında, eləcə də əməkdaşların işgüzarlığının artırılmasında əhəmiyyətdən danışıb. 
Təlim Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin mütəxəssisi Şəhla Mirzəzadənin moderatorluğu ilə keçirilib. İlk öncə Mərkəzi Gömrük Hospitalının Marketinq və Planlaşdırma şöbəsinin PR üzrə mütəxəssisi Dilarə Zamanova “Vaxtın İdarə edilməsi” mövzusunda, Poliklinika şöbəsinin böyük tibb bacısı Nigar Maqsudova “İnsanları tanıma sənəti” və uzman psixoloq Mahirə Pənahlı “İş mühitində effektiv ünsiyyət” mövzularında təlimlər aparıblar. Təlimdə vaxtın düzgün və səmərəli idarə edilməsinin qaydaları və iş prosesində tətbiqinin işgüzarlığa göstərdiyi müsbət təsirləri, insanları tanıma prinsinpləri, ünsiyyətin növləri və digər mövzularda ətraflı məlumat verilib.
Təlimin sonunda iştirakçıların sualları cavablandırılıb, mövzular ətrafında geniş müzakirələr aparılıb. Təlim xatirə şəklinin çəkilməsi ilə başa çatıb.